ОАВ: Британия бош вазири коррупцияда гумон қилинмоқда

Буюк Британия бош вазири Борис Жонсон коррупцияда гумон қилинмоқда. Бу ҳақда Reuters агентлиги хабар берди.

«Буюк Британиянинг Сайлов комиссияси эҳтимолий жиноят тўғрисидаги маълумотлар асосида Бош вазирнинг Даунинг-Стритдаги Лондон қароргоҳини таъмирлаш ишлари масаласини ўрганмоқда», — дейилади агентлик хабарида.

Жонсоннинг рақибларига кўра, бош вазир яшаш жойининг ҳашаматли таъмири учун партия ҳомийларига яширинча ўн минг фунт стерлинг пул ажратишига рухсат бериб, Битания қонунларини бузган бўлиши мумкин.

Reutersнинг таъкидлашича, Парламентдаги нутқи давомида Жонсон барча таъмирлаш харажатларини ўзи қоплаганини даъво қилди. Лекин бош вазир буни низолар бошлангандан кейин қилганми, деган саволга тўғридан-тўғри жавоб беришдан қочди.

Агар сайлов комиссияси Жонсоннинг қонунни бузганини тасдиқловчи далилларни топса, унга 20 минг фунт стерлинг миқдорида жарима солиниши ёки ҳуқуқни муҳофаза қилиш идоралари томонидан алоҳида тергов ўтказилиши мумкин.

Аввалроқ Буюк Британия бош вазири Борис Жонсон Оксфордшир графлигида жойлашган коттежини ижарага бермоқчи эканини маълум қилди. Коттежнинг умумий майдони ёнма-ён қурилган бино билан биргаликда 288,5 квадрат метрни ташкил этади, уй мебелларсиз ижарага берилади. Уй ҳайвонларини хонадонда парвариш қилишга ҳам уй эгалари билан келишган ҳолда рухсат олинади. Эълон бўйича уйнинг ҳафталик ижараси — 981 фунт стерлинг (ойига 4,25 минг фунт).