Boris Jonson Shimoliy Irlandiya uchun vaksinalarni eksporti qilishga qo‘yilgan taqiqni Yevropa komissiyasi rahbari bilan muhokama qildi

Buyuk Britaniya bosh vaziri Boris Jonson 29-yanvar kuni Yevropa komissiyasi rahbari Ursula fon der Lyayen bilan vaksinaning Shimoliy Irlandiyaga yetkazilishiga qo‘yilgan taqiqqa oid vaziyatni muhokama qildi. Ushbu taqiqni joriy etish uchun Yevropa komissiyasi “Breksit” bitimidagi alohida moddani ishga tushirgan. Bu haqda bosh vazir devonxonasi tomonidan tarqatilgan bayonotga tayanib, “TASS” xabar berdi.

“Boris Jonson Yevropa Ittifoqining bugungi qadami vaksinalar eksportiga potensial ta’sir ko‘rsatishi mumkinligi yuzasidan qattiq xavotirda ekanini bildirdi”, — deydi hukumat vakili. Avvalroq Jonson ushbu vaziyatni Irlandiya bosh vaziri Mikal Martin bilan muhokama qilgandi.

29-yanvar kuni Yevropa Ittifoqi yangi turdagi koronavirusga qarshi vaksinani o‘z hududidan ittifoqqa a’zo davlatlarning maxsus ruxsatisiz eksport qilishni taqiqlovchi mexanizmni zudlik bilan ma’qullagan. Sxema kamida mart oxiriga qadar amalda bo‘ladi va faqat YI dastlabki xaridlar bo‘yicha bitimlar tuzgan kompaniyalarning dori vositalari eksportiga taalluqli.

Yevropa komissiyasining aniqlik kiritishicha, cheklov hududi Yevropa Ittifoqiga kiradigan Shimoliy Irlandiyaga ham taalluqli hisoblanadi, “Breksit” bitimi shartlariga ko‘ra, Irlandiya shaffof qolishi kerak.

Yevropa Ittifoqi ushbu imkoniyat Buyuk Britaniya hududiga vaksinalar reeksportini ochishi mumkinligidan xavotirga tushgan va fors-major holatlarida cheklovlarni joriy etish uchun Shimoliy Irlandiya to‘g‘risidagi protokolning 16-moddasini bir tomonlama tartibda ishga tushirgan.