OAV: Britaniya bosh vaziri korrupsiyada gumon qilinmoqda

Buyuk Britaniya bosh vaziri Boris Jonson korrupsiyada gumon qilinmoqda. Bu haqda Reuters agentligi xabar berdi.

“Buyuk Britaniyaning Saylov komissiyasi ehtimoliy jinoyat to‘g‘risidagi ma’lumotlar asosida Bosh vazirning Dauning-Stritdagi London qarorgohini ta’mirlash ishlari masalasini o‘rganmoqda”, — deyiladi agentlik xabarida.

Jonsonning raqiblariga ko‘ra, bosh vazir yashash joyining hashamatli ta’miri uchun partiya homiylariga yashirincha o‘n ming funt sterling pul ajratishiga ruxsat berib, Bitaniya qonunlarini buzgan bo‘lishi mumkin.

Reutersning ta’kidlashicha, Parlamentdagi nutqi davomida Jonson barcha ta’mirlash xarajatlarini o‘zi qoplaganini da’vo qildi. Lekin bosh vazir buni nizolar boshlangandan keyin qilganmi, degan savolga to‘g‘ridan to‘g‘ri javob berishdan qochdi.

Agar saylov komissiyasi Jonsonning qonunni buzganini tasdiqlovchi dalillarni topsa, unga 20 ming funt sterling miqdorida jarima solinishi yoki huquqni muhofaza qilish idoralari tomonidan alohida tergov o‘tkazilishi mumkin.

Avvalroq Buyuk Britaniya bosh vaziri Boris Jonson Oksfordshir grafligida joylashgan kottejini ijaraga bermoqchi ekanini ma’lum qildi. Kottejning umumiy maydoni yonma-yon qurilgan bino bilan birgalikda 288,5 kvadrat metrni tashkil etadi, uy mebellarsiz ijaraga beriladi. Uy hayvonlarini xonadonda parvarish qilishga ham uy egalari bilan kelishgan holda ruxsat olinadi. E’lon bo‘yicha uyning haftalik ijarasi — 981 funt sterling (oyiga 4,25 ming funt).