Нукусда ўзини каналга ташлаган 21 ёшли қизни Миллий гвардия ходимлари қутқариб қолгани ҳақида хабар берилганди. Мазкур ҳолат Сенатнинг Хотин-қизлар ва гендер тенглик масалалари қўмитаси томонидан ўрганиб чиқилди.
Унга кўра, 2021 йил 26 апрель куни соат 08:30 лар чамаси Нукус шаҳар «Жийдели байсин» маҳалласида яшовчи 2000 йилда туғилган фуқаро Н.Д. ўз жонига қасд қилиш мақсадида Нукус шаҳридаги «Дўстлик» каналига ўзини ташлаган. Шу жойда хизмат вазифасини бажараётган Миллий гвардия ходими қизни қутқариб қолган.
Н.Д.га биринчи тиббий ёрдам кўрсатилган. Ҳозирда фуқаро Н.Д. ўз уйида ва соғлиғи бўйича ҳеч қандай шикояти йўқ. Ўз жонига қасд қилиш сабаблари ўрганиб чиқилганда, қиз ҳеч қандай тазйиқ остида бўлмаганини, оиласида ҳам ҳеч қандай жанжал йўқлигини ва ўртоғи билан тортишиб қолганлигини айтиб ўтган.
Фуқаро Н.Д. Нукус шаҳрида оиласи билан биргаликда яшайди. 2017 йилда Н.Д. Нукус шаҳар ИИБ томонидан профилактик ҳисобга олинган.
Бундан аввал Қашқадарёдаги қамоқхонада маҳкум ўзини осиб қўйгани, Ўзбекистонда 2020 йилда вояга етмаганларнинг 500 нафардан ортиғи ўз жонига қасд қилгани ҳамда Наманганда 4 ёшли боласини ўзига боғлаб сувга сакраган аёл қутқариб олингани ҳақида хабар берилганди.
Изоҳ (0)