Ўзбекистон ва Украина ўртасидаги авиапарвозлар май ойида қайта тикланади

Ўзбекистон ва Украина тўғридан-тўғри парвозларни 2021 йил май ойида тиклайди. Бу ҳақда транспорт вазири, «Ўзбекистон ҳаво йўллари» авиакомпанияси раиси Илҳом Маҳкамов 28 апрель куни бўлиб ўтган матбуот анжуманида маълум қилди, деб хабар беради «Gazeta.uz».

«Киев билан музокаралар олиб борилмоқда, бизда аниқ режа бор. Пандемия туфайли ҳеч нарса кескин ўзгармаса, биз май ойидан бошлаб парвозларни ҳафтасига икки ёки уч марта амалга оширишни режалаштирмоқдамиз. Ҳозирча улар бизга UIA (Украина халқаро авиакомпанияси) ва SkyUp авиакомпанияларини таклиф қилмоқда», — деди Транспорт вазирлиги раҳбари.

Бундан ташқари, май ойидан бошлаб «Ўзбекистон ҳаво йўллари» янги бизнес-моделга ўтиш доирасида Париж, Рим, Милан, Амритсар, Мумбай, Бангкок, Токио, Куала-Лумпур ва Жакартага амалга ошириладиган 9 та рентабелсиз рейсни бекор қилишни режалаштирмоқда. Бу эса авиакомпаниянинг 12,3 миллион долларлик харажатларини тежашга имкон беради. Вазирнинг сўзларига кўра, ушбу йўналишлар кўп йиллар давомида паст рентабелли бўлиб келган ва авиакомпаниянинг молиявий ҳолатига салбий таъсир кўрсатган.

«Буни (бекор қилинган рейсларни — таҳр.) ҳам пандемия, ҳам авиакомпаниянинг янги стратегияси билан боғлаш мумкин. Агар ушбу минтақаларга эҳтиёж сезилса, биз ҳар доим чартер рейсларини йўлга қўйиш ва у ердан одамларни олиб келиш имкониятига эгамиз. Аслида бу тажриба ҳамма жойда қўлланилади», — деди Илҳом Маҳкамов.

«Агар одатдаги мунтазам рейсларга ўтиш мақсадга мувофиқ бўлса, бунинг учун ҳар доим ҳам имконият бор», — дея қўшимча қилди у.

Эслатиб ўтамиз, 2015 йилда узилиб қолган Ўзбекистон ва Украина ўртасида тўғридан-тўғри доимий парвозларни тиклаш масаласи узоқ вақтдан бери муҳокама қилиб келинмоқда. 2020 йилнинг июнь ойида Украинанинг SkyUp Airlines лоукостери Ўзбекистонга парвозларни амалга ошириш учун ариза берган. Октябрь ойида эса ушбу авиакомпания Тошкент ва Киев ўртасида мунтазам авиақатновларни йўлга қўйишни режалаштираётгани хабар қилинди. Бу парвозларнинг нархи 300 долларни ташкил қилиши мумкинлиги маълум қилинган.

Шунингдек, «Украина халқаро авиалиниялари» авиакомпанияси Тошкент ва Киев ўртасида рейсларни тиклашни режалаштираётгани ҳақида хабар берилганди.