Андижон тумани ҳокимлиги вакили фуқарога ер ажратиб беришни ваъда қилиб, воситачидан пул олаётган вақтда ушланди. Бу ҳақда «Дарё»га ДХХ маълум қилди.
Қайд этилишича, Андижон шаҳрида яшовчи шахс бошқа фуқарога Андижон тумани ҳокимлигидаги мансабдор танишлари орқали чорвачилик билан шуғулланиши учун адирлик ерлардан ажратиб беришни ваъда қилган.
Бунинг учун 15 миллион сўм олган вақтида ушланган. Суриштирув давомида у пулларни Андижон тумани ҳокимлигидаги танишига бериши кераклиги маълум бўлган.
Давом эттирилган тезкор тадбирда ҳокимлик ходими ҳам 15 миллион сўмни олганида қўлга олинди.
Аниқланишича, ҳокимият вакили олдин ҳам фирибгарлик жиноятини содир қилган. 2021 йил январида суд унга нисбатан ойлик иш ҳақининг 20 фоизини давлат даромади ҳисобига ушлаб қолган ҳолда 1 йил 6 ой муддатга ахлоқ тузатиш ишлари жазосини тайинлаган.
Бундан аввал бош прокурор Ўзбекистонда 2020 йил ер билан боғлиқ масалаларда қанча мансабдор жавобгарликка тортилганини маълум қилгани, Андижонда 100 гектар ерни 128 минг долларга сотишга уринган ҳокимият ходими қўлга олингани ҳамда Тошкент вилоятида қарийб 160 гектар ер ноқонуний ўзлаштириб олингани аниқлангани ҳақида хабар берилганди.
Изоҳ (0)