Бугун,

  • USD 11095.31
  • RUB 173.84
  • EUR 10772.44

2021 йилнинг 24 апрель, шанба куни Тошкент шаҳри мезбонлик қилган оғир атлетика бўйича Осиё чемпионатида -109 килограмм вазн тоифасидаги спортчилар ўртасидаги беллашувда Рио—2016 Олимпиадаси чемпиони Руслан Нуриддинов ҳам иштирок этди. Спортчи икки йиллик тақиқдан сўнг илк бор мазкур катта мусобақада кўриниш берди. У мусобақада 241 килограммни бўйсундириб, ҳам силтаб кўтаришда, ҳам икки кураш натижасига кўра Осиё ва Жаҳон рекордларини янгилашга муваффақ бўлди. Шу тариқа Нуриддинов олтин медални қўлга киритди. Таниқли оғир атлетикачи «Дарё» мухбири Миролим Исажонов билан суҳбатда тақиқ давридаги ўй-фикрлари, фермерлик фаолияти ва келгусидаги режалари тўғрисида гапирди.

Фото: PressPhoto.Uz / Дилруҳ Исомиддинова

— Икки йиллик тақиқдан кейинги илк мусобақадаёқ ғалаба қозониб, яна рекорд ўрнатгани ва буни кутмагани ҳақида

— Очиғини айтсам, «Осиё чемпионатида катта натижа кўрсатаман ёки рекорд ўрнатаман», деган ўзимда қатъий ишонч йўқ эди, хаёлимда ҳам бундай фикр бўлмаган. Чунки яқинда ўтказилган Ўзбекистон чемпионатида Акбаржон Жўраевга 12 килограмга ютқазгандим. Осиё чемпионатида ҳам асосий рақибим Акбаржон эди. Аммо Осиё чемпионатида биринчи йўналишда хатоликларга йўл қўйган бўлсам-да, иккинчи йўналишда, яъни силтаб кўтаришда хато қилмасликка интилдим ва шу тариқа ғолибликни қўлга киритдим.

— Акбар Жўраев билан рақобати ва у бўлмаганда рекорд қайд эта олмаслиги ҳақида

— Тақиқда бўлган пайтимда Акбаржон Жўраев -109 килограмм вазн тоифасига ўтган эди. Ундан олдин эса -102 килограмм вазн тоифасида фаолият олиб борган. У билан шу йилнинг март ойи бошида Чирчиқ шаҳрида бўлиб ўтган Ўзбекистон чемпионатида биринчи марта тўқнаш келдик. Кейин Осиё чемпионатида рақобат қилдик ва ўша куни унга «Сен бўлмасанг, мен буни уддалай олмасдим», деб айтдим. Негаки машғулотлар пайтида бир-биримиздан ўзишга интилиб, жиддий тайёрландик. Соғлом рақобат ҳаммада соҳада бўлиши керак, назаримда. Рақобатсиз ўсиш, ривожланиш бўлмайди.

Акбар Жўраев (чапда), Руслан Нурудинов (ўртада), Янг Чже (ўнгда)

Акбар Жўраев (чапда), Руслан Нурудинов (ўртада), Янг Чже (ўнгда)
Фото: PressPhoto.Uz / Дилруҳ Исомиддинова

— Осиё чемпионатида рекорд ўрнатган бўлсангиз-да, аммо Токио Олимпиадасида иштирок эта олмаслиги ва бунинг ўзига таъсири ҳақида

— Бу аввалоси тақдир. Токио Олимпиадасида қатнашмаслигимни тақиқдалигимдаёқ билганман ва бунга ачинарли ҳолат сифатида қарамайман. Бу менинг хатти-ҳаракатим, кайфиятимга салбий таъсир кўрсатмайди. Ушбу нуфузли мусобақада ризқ-у насибам йўқ экан, Аллоҳнинг айтгани бўлади барибир. Насиб қилса, Париж—2024 Олимпия ўйинларига жиддий тайёргарлик кўриб, унда, албатта, ғалаба қозонаман.

— Тақиқ вақтида фаолиятини якунламоқчи бўлгани ҳақида

— Албатта, бундай ўй-фикр бўлди. Қийин дамларда карьерамга нуқта қўйиш тўғрисида кўп ўйладим.

— Қийин дамларни бошдан кечиргани ҳақида

— Спортдан четлатилган пайтимда терма жамоа билан бирга ишлаш ҳуқуқим йўқ эди. Табиийки, оғир атлетика федерацияси ҳам бу ҳуқуқни менга бера олмасди. Лекин федерация раҳбарияти каминага эътибор қаратиб, имкон қадар қўллаб-қувватлади, алоҳида шуғулланишим учун зал берди. Аммо шунча йил жамоадан ажралмаган ҳолда машғулотлар олиб борган одамнинг бирданига ёлғиз шуғулланиши ғалати бўларкан.

Бир йил давомида залга фақат кунлик режа учун бордим, олдимда аниқ бир мақсадим йўқ эди. 2019 йил оҳирида руҳан чарчадим, «Нима мақсадда залга келиб, шуғулланяпман ўзи?», деган турли саволлар туғилди. Чунки у пайтда суднинг қандай якун топиши, спортдаги кейинги тақдирим қандай бўлиши номаълум эди. Шу боис бир неча ойга ўз хоҳишим билан залдан узоқлашдим.

Руслан Нуриддинов Осиё чемпионатидаги ғалабасидан сўнг қизалоғи билан

Руслан Нуриддинов Осиё чемпионатидаги ғалабасидан сўнг қизалоғи билан
Фото: Оғир атлетика федерацияси

Лекин ҳар нарсада ҳикмат бор экан. Тақиқ пайтида шахсий ҳаётимга вақт ажратиб, бўйдоқлар сафини тарк этдим, фарзандли ҳам бўлдим. Ўтган йилнинг май ойида суд жараёни билан боғлиқ хушхабарлар эшитганимдан кейин қалбимда умид, ишонч туғилди. Энг асосийси, машғулотларни давом эттиришга истак пайдо бўлди. Уч-тўрт ой мобайнида яна жамоасиз якка шуғулландим. Дисквалификация муддати тугашига яқин вақт қолганида терма жамоа сафига қайтдим.

Фото: Оғир атлетика федерацияси

— Шахсий мактаб ва мураббийлик ҳақида

— Тақиққа тушган вақтимда ўзим истиқомат қиладиган ҳудуд, яъни Учтепа тумани ҳокимлигига ҳам бу борада ёрдам беришларини сўраб мурожаат қилгандим. Мактаб очиш бўйича ҳаракатлар бошланган пайтда яна катта спортга қайтиб, у режамни тўхтатиб қўйишимга тўғри келди. Осиё чемпиоантидаги натижамдан сўнг яқин йиллар ичида мураббийлик фаолиятимни бошламасликка қарор қилдим. Ҳали кўп йиллар юртимиз довруғини яна ҳам дунёга ёйиш ниятидаман.

— Фермерлик фаолиятига якун ясагани ҳақида

— Афсуски, коронавирус пандемияси ва карантиндаги бир қанча қийинчиликлар сабаб 2020 йилда бу фаолиятимни тугатдим. Шунингдек, фермерлик қилишимга вақт масаласида ҳам бироз муаммо бўлди.

— Навбатдаги режалари ҳақида

— 2021 йил олдимда турган энг муҳим мусобақа бу – Жаҳон чемпионати. 28 апрелдан 29 апрелга ўтар кечаси терма жамоа билан Россиянинг Владивосток шаҳрига ўқув-йиғин машғулотларига жўнаб кетамиз. Сўнгра Чирчиқ шаҳрида машғулотларни давом эттирамиз. Сентябрь ойида Ислом бирдамлик ўйинлари ўтказилиши ҳам кутилмоқда. Аммо унинг қачон ўтказилиш санаси аниқ эмас. Бу мусобақада қатнашиш мен учун ҳам жуда қизиқ.

Эслатиб ўтамиз, 2018 йилда Нуриддинов 2012 йилги Лондон Олимпиадасидаги таҳлилларидан допинг топилгани учун дисквалификацияга учраганди. 2020 йилнинг декабрида дисквалификация муддати якунига етганди.

Изоҳ
Асосий янгиликлар
Маҳаллий
“Гуруҳларда ҳазил ёки киноя қилиб айтган гапларимни ҳам чиқариб юборадиган журналистлар бор” — Шоҳрух Ғиёсов
Маҳаллий
“Кўпчилик мени ёлғон маълумот тарқатганликда айблайди” — Шоҳрух Ғиёсов журналист ва блогерларнинг ўзига муносабати ҳақида гапирди
Маҳаллий
Қўшимча талаб этиладиган 37,5 минг тонна пиёз 1 апрелга қадар ички бозорларга киритилади