Россияда 2020 йилда вафот этганлар сони 323,8 минг кишига кўпайиб, 2 миллион 124 500 кишига етди. Бу ҳақда Россия Соғлиқни сақлаш вазирлигига таяниб Meduza хабар берди.
Мамлакатда 2020 йилда умумий ўлим даражаси 17,9 фоизга ошган (ҳар 1000 кишига 14,5 та ўлим ҳолати). 2019 йилда эса 1000 кишига 12,3 та ўлим тўғри келган эди.
Ушбу маълумотлар Россия Федерал давлат статистика хизматининг февраль ойида тақдим этган дастлабки натижаларига кўра тайёрланди. Ўшанда Россия бош вазири ўринбосари Татьяна Голикова ушбу ўсиш коронавирус натижасида юзага келган ўлим ҳолатлари туфайли юзага келганини маълум қилган эди. COVID-19 ёки бошқа касалликлар туфайли вафот этганлар 2020 йилда ортиқча ўлимларнинг жами 50 фоизини ташкил қилган.
Шунингдек, Соғлиқни сақлаш вазирлигининг ҳисоботига кўра, Россияда 2020 йилда ўртача умр кўриш давомийлиги 1,84 йилга камайиб, 71,5 йилни ташкил этган. Бу кўрсаткич 2019 йилда 73,34 йил эди. Соғлиқни сақлаш вазири Михаил Мурашко буни пандемия таъсири билан изоҳлади.
The New York Times нашрининг ёзишича, Россия коронавирус пандемияси шароитида ўлим кўрсаткичининг юқорилиги бўйича Европа ва АҚШни ортда қолдирди.
Март ойида Россия Федерал давлат статистика хизмати пандемия бошидан буён Россия аҳолисининг COVID-19’дан вафот этганлар сони 200 минг кишига етганини маълум қилди.
Маълумот учун, Россияда коронавирусга қарши 3 та вакцина рўйхатдан ўтказилган: «Гамалея» марказининг «Спутник V», Новосибирскнинг «Вектор» маркази томонидан ишлаб чиқилган «ЭпиВакКорона» ва Чумаков номидаги марказ ишлаб чиққан «КовиВак». Россияда аҳолини COVID-19’га қарши эмлаш ишлари 2020 йил декабрь ойида бошланган. 2021 йил январь ойи ўрталарида оммавий вакцинацияга старт берилган.
Мавзуга доир:
Изоҳ (0)