Жонс Ҳопкинс университети маълумотларига кўра, дунёда коронавирус билан касалланганлар сони 147 883 829 кишига етди. Ушбу кўрсаткич бўйича доимгидек АҚШ (32,1 миллион), Ҳиндистон (17,6 миллион), Бразилия (14,3 миллион), Франция (5,5 миллион) ва Россия (4,7 миллион) энг олдинда бормоқда.
Дунё бўйича коронавирус оқибатидаги ўлимлар эса 3 120 894 тага етди.
Қозоғистонда маҳаллий QazVac вакцинаси билан оммавий эмлаш бошланди
Қозоғистон Соғлиқни сақлаш вазирлиги 26 апрелдан мамлакатнинг ўзида ишлаб чиқарилган QazVac вакцинаси билан фуқароларни оммавий эмлашни бошлади. Вакцина 18 ёш ва ундан катта одамлар учун тавсия этилган.Препаратнинг 50 мингта дозадан иборат биринчи партияси аввалроқ мамлакат ҳудудларига етказилган эди.
Қозоғистонда, шунингдек, Россиянинг «Спутник V» вакцинаси билан ҳам эмлашмоқда. Муассаса қайд этишича, фуқаролар қайси вакцина билан эмланишни ўзлари танлаши мумкин.
QazVac препарати Биологик хавфсизлик муаммолари илмий-тадқиқот институти мутахассислари томонидан ишлаб чиқилган.
«Қозоғистон вакцинаси синовларининг учинчи босқичи тадқиқот субъектларининг 50 фоизида ўз якунига етди, уни жорий йилнинг 25 июнида тугатиш режалаштирилмоқда. Шундан кейин QazVac самарадорлиги узил-кесил баҳоланади», — дейилади ССВ хабарида.
Муассаса қўшимча қилишича, агар беморларда номақбул реакциялар кузатилса, препаратни вақтинчалик рўйхатдан ўтказиш жараёни тўхтатилади ёки бекор қилинади.
Май ойида мамлакатда яна 50 минг доза маҳаллий вакцинани ишлаб чиқариш кутилмоқда. Келажакда ишлаб чиқариш ҳажми босқичма-босқич ойига 500 минг дозагача етказилади.
Мавзуга доир: Қозоғистонда аҳолини коронавирусга қарши эмлаш бошланди
Эквадор вакцина олишда Россия, АҚШ ва Хитойдан ёрдам сўради
Эквадор сайланган президенти Гилермо Лассо Россия, АҚШ ва Хитой ҳукуматларига мурожаат қилиб, мамлакатга коронавирусга қарши вакцина сотиб олишда ёрдам сўради.Лассонинг сўзларига кўра, у Россия президенти Владимир Путинга «вакциналар масаласида кўмак ҳақидаги илтимос билан» хат йўллаган ва етказиб беришни тезлаштириш бўйича жараённи бошлаган.
Хитой раиси Си Цзиньпин билан суҳбат чоғида эса Лассо ундан Эквадор ҳукумати аллақачон сотиб олган вакцина дозаларини етказиб беришни тезлаштиришни ва янгиларини маъқуллашни сўраган. Сайланган президентнинг сўзларига кўра, Хитой томонидан тақдим этиладиган кўмак натижасида Кито ва Пекин ўртасидаги алоқалар «янада қалинлашади». У шунингдек, АҚШ давлат котиби Энтони Блинкен билан мулоқот қилиб, зарур препаратларни етказилиши ҳажмини оширишга чақирган.
Лассо вакцинацияни устувор вазифа деб ҳисоблашини айтди. Аввалроқ у ҳокимият тепасида ўтказган биринчи 100 кун ичида 9 миллион киши эмланишига ваъда берган эди. Сайланган президент 24 май куни давлат раҳбари лавозимига киришиши керак.
50 та мамлакатда COVID-19’га қарши вакцинация туфайли режали эмлашлар кейинга қолдирилди
Дунёнинг 50 та мамлакатида аҳолини коронавирусга қарши эмлаш ишлари туфайли, қизамиқ ва бошқа касалликларга қарши эмлашлар кейинга қолдирилди. Бу ҳақда Жаҳон соғлиқни сақлаш ташкилоти, БМТнинг Болалар фонди ҳамда Вакцина ва иммунизация бўйича глобал альянс маълум қилди.«Янги маълумотларга кўра, иммунизация бўйича ҳаёт учун муҳим кампанияларнинг 60 таси 50 та мамлакатда кейинга сурилган, бу 228 миллион кишини, асосан, болаларни қизамиқ, полиомиелит ва сариқ безгак каби хавфларга дучор қилади», — дейилади ЖССТ баёнотида.
«Ушбу 50 та мамлакатнинг ярмидан кўпи Африкада жойлашган, бу эса одамларнинг вакцинадан фойдаланиш имкониятлари тенгсизлигини янада таъкидлаб кўрсатади», — деди ЖССТ.
Ташкилотдагилар қайд этишича, айнан режали вакцинациянинг кейинга сурилиши туфайли яқинда Конго Демократик Республикаси, Покистон ва Яманда қизамиқ авж олиши кузатилган.
«Агар биз қизамиқ, сариқ безгак ва дифтерит каби ўлимга олиб келувчи касалликларнинг авж олишини хоҳламасак, биз дунёнинг ҳар битта мамлакатида оддий вакцинация хизматларини ҳимоя қилишимиз керак», — дейилади ЖССТ раҳбари Тедрос Адханом Гебрейесуснинг баёнотида.
Францияда COVID-чекловларни юмшатиш бошланди
Францияда апрель бошида жорий қилинган локдаундан босқичма-босқич чиқиш доирасида 26 апрелдан болалар боғчалари ва мактаблар ўз фаолиятини тиклади.Аммо ўрта ва юқори синф ўқувчилари шу ҳафта онлайн режимда қолиши керак. Улар 3 майдан қатнаб ўқишни бошлайди.
«Биз аста-секинлик билан очилмоқчимиз, — деди Мелён шаҳридаги бошланғич мактабга ташриф буюрган Франция президенти Эммануэль Макрон. — Вирус тарқалиши яна авж олмаслиги учун буни жуда секинлик билан амалга оширамиз».
Келаси ҳафтадан Францияда мамлакат ичидаги сафарлар учун тақиқ бекор қилинади, бироқ 19:00 дан 6:00 гача давом этадиган комендантлик соати сақланиб қолади.
Май ўрталаридан эса Францияда энг муҳим маҳсулотлар дўконлари ва баъзи маданий майдонлар очила бошлайди. Ресторан ва кафелар айвонлари ҳам ишга тушади.
Айни вақтда Францияда интенсив даволаш палаталаридаги COVID-беморлар сони ўтган йил баҳоридан буён энг юқори кўрсаткичларга етмоқда. Ҳозир у ерда 6 мингга яқин бемор бор.
Охирги пайтларда Францияда коронавирусга чалиниш ҳолатлари кунига 30 мингтани ташкил қилмоқда, бу шу ой бошидаги кўрсаткичлардан 10 мингтага кам демакдир.
Макроннинг сўзларига кўра, аҳолининг катта қисми COVID-19’га қарши эмланганидан кейин, келаси ой коронавирус билан боғлиқ вазият яхшиланишини кутмоқда.
Мавзуга доир: Францияда умуммиллий карантин жорий қилинди
Изоҳ (0)