Британия Магницкий иши бўйича 14 нафар россияликка қарши санкциялар киритди

Буюк Британия Магницкий иши ва Россия бюджетидан 230 миллион АҚШ доллар ўғирланиши билан боғлиқ 14 нафар Россия фуқаросига қарши санкциялар жорий қилди. Бу ҳақда Буюк Британия ташқи ишлар вазирлиги матбуот хизматига таяниб, «РБК» хабар берди.

Чекловлар остида, хусусан, Ички ишлар вазирлигининг Москва бошқармаси солиқ жиноятлари департаменти бошлиғининг собиқ ўринбосари Артём Кузнецов(унинг ташаббуси билан Магницкийга қарши жиноий иш қўзғатилган); ушбу иш бўйича масъул бўлган Ички ишлар вазирлигининг собиқ терговчиси Павел Карпов; Москвадаги 28-сонли Федерал солиқ хизмати инспекциясининг собиқ раҳбари Ольга Степанова ва унинг собиқ эри Владлен Степанов (улар Буюк Британия ҳукумати томонидан ҚҚСни бюджетдан қайтариш ва  маблағларни чет элга олиб чиқиш схемасининг иштирокчиларидан бири деб ҳисобланади) бор.

Бундан ташқари, санкциялар рўйхатига Москва прокуратураси терговчиси Станислав Гордиевский, Москвадаги 25-сонли Федерал солиқ хизмати инспекцияси бошлиғи Елена Химина, Ички ишлар вазирлиги ҳузуридаги Тергов қўмитасининг собиқ терговчиси Олег Уржумсев, адвокатлар Андрей Павлов ва Юлия Майорова, тижорат тузилмалари директорлари Геннадий Плаксин, Дмитрий Клюев ва Алексей Шешеня, ишбилармонлар Вячеслав Хлебников ва Виктор Маркелов сингари кишилар киритилган. Британия ҳукумати уларни ҚҚСни қайтариш бўйича фирибгарлик ва коррупцияга, шунингдек Магницкий ишига алоқадор деб ҳисоблайди.

Санкциялар Лондоннинг 2018 йилдаги Жиноий фаолиятдан олинган даромадларни легаллаштиришга қарши курашиш тўғрисидаги қонунига мос келади. Унда Британия ҳукумати коррупцияга алоқадор деб топган ташкилотлар ва шахсларга чекловлар қўйиш белгиланган.

Буюк Британиянинг санкциялари остида қолган фуқароларнинг Буюк Британияга кириши тақиқланади ва уларнинг мамлакатдаги активлари музлатиб қўйилади. Бундан ташқари, Буюк Британия фуқаролари ва маҳаллий ташкилотларга санкция остидаги шахслар билан молиявий операцияларни ўтказмаслик тавсия этилади.

Адвокат ва аудитор Сергей Магницкий Россияда 2008 йилда Hermitage Capital фондининг солиқ тўлашдан бўйин товлаш иши билан ҳибсга олинган. У 2009 йилда «Матросская Тишина» тергов изоляторида вафот этди. Вафотидан кейин 2013 йилда айбдор деб топилди. Hermitage Capital раҳбари Уильям Браудернинг сўзларига кўра, Магницкийни таъқиб қилиш унинг Россия бюджетидан маблағ олиб чиқишнинг коррупцион схемасини фош қилгани билан боғлиқ.

Президент Владимир Путин 2018 йилда Дональд Трамп билан музокаралар якунларига кўра «Браудернинг бизнес шериклари Россияда ноқонуний равишда 1,5 миллиард доллардан кўпроқ даромад олган, на Россияда, на Бирлашган Қиролликда солиқ тўламаган. Аммо бу пул АҚШга ўтказилган».

2012 йилда Қўшма Штатлар «Магницкий акти»ни қабул қилди, у инсон ҳуқуқларини бузишда иштирок этган россияликларга қарши шахсий санкцияларни жорий этишга имкон беради. 2020 йил декабрда Европа Иттифоқи худди шундай чеклов режимини тасдиқлади. 2021 йил 26 апрелда Буюк Британиянинг санкциялари остида қолган россияликларга бунгача АҚШ ва Европа Иттифоқи томонидан ҳам чекловлар жорий қилинган эди.