Rossiyada 2020-yilda vafot etganlar soni 323,8 ming kishiga ko‘payib, 2 million 124 500 kishiga yetdi. Bu haqda Rossiya Sog‘liqni saqlash vazirligiga tayanib Meduza xabar berdi.
Mamlakatda 2020-yilda umumiy o‘lim darajasi 17,9 foizga oshgan (har 1000 kishiga 14,5 ta o‘lim holati). 2019-yilda esa 1000 kishiga 12,3 ta o‘lim to‘g‘ri kelgan edi.
Ushbu ma’lumotlar Rossiya Federal davlat statistika xizmatining fevral oyida taqdim etgan dastlabki natijalariga ko‘ra tayyorlandi. O‘shanda Rossiya bosh vaziri o‘rinbosari Tatyana Golikova ushbu o‘sish koronavirus natijasida yuzaga kelgan o‘lim holatlari tufayli yuzaga kelganini ma’lum qilgan edi. COVID-19 yoki boshqa kasalliklar tufayli vafot etganlar 2020-yilda ortiqcha o‘limlarning jami 50 foizini tashkil qilgan.
Shuningdek, Sog‘liqni saqlash vazirligining hisobotiga ko‘ra, Rossiyada 2020-yilda o‘rtacha umr ko‘rish davomiyligi 1,84 yilga kamayib, 71,5 yilni tashkil etgan. Bu ko‘rsatkich 2019-yilda 73,34 yil edi. Sog‘liqni saqlash vaziri Mixail Murashko buni pandemiya ta’siri bilan izohladi.
The New York Times nashrining yozishicha, Rossiya koronavirus pandemiyasi sharoitida o‘lim ko‘rsatkichining yuqoriligi bo‘yicha Yevropa va AQShni ortda qoldirdi.
Mart oyida Rossiya Federal davlat statistika xizmati pandemiya boshidan buyon Rossiya aholisining COVID-19’dan vafot etganlar soni 200 ming kishiga yetganini ma’lum qildi.
Ma’lumot uchun, Rossiyada koronavirusga qarshi 3 ta vaksina ro‘yxatdan o‘tkazilgan: “Gamaleya” markazining “Sputnik V”, Novosibirskning “Vektor” markazi tomonidan ishlab chiqilgan “EpiVakKorona” va Chumakov nomidagi markaz ishlab chiqqan “KoviVak”. Rossiyada aholini COVID-19’ga qarshi emlash ishlari 2020-yil dekabr oyida boshlangan. 2021-yil yanvar oyi o‘rtalarida ommaviy vaksinatsiyaga start berilgan.
Mavzuga doir:
Izoh (0)