Фото: Дунёнинг энг машҳур «жонли Барби»лари

Болалигида қўғирчоқ ўйнаган қизалоқлар ҳозирда ўзлари қўғирчоққа айланган. Дунёдаги энг машҳур «тирик Барби»лар билан танишинг.

Синди Жексон

Америкалик Синди Жексон энг кўп пластик операция қилдирган аёл сифатида Гиннеснинг рекордлар китобига кирган. Ҳаммаси Синди 30 ёшида эга бўлган мерос воқеасидан бошланди. Ўша пайтда у севиб қолган эркаклар қиз билан яхши муомалада бўлмас, уни семиз, хунук деб ташлаб кетарди. Катта миқдордаги меросга эга бўлган Синди юзини торттириш ва қорин бўшлиғини липосакция қилиш, кўз қовоқлари, бурун ва иякни пластик операция қилиш, кўкрак ва лабларни катталаштириш, қовурғаларни олиб ташлаш, ёноқ суякларини тўғрилаш учун имплантант қўйдириш, қалин сочга эга бўлиш учун соч фолликулаларини эктириш каби бир қанча жарроҳлик муолажаларини қилдирган. Унинг «Жонли Барби» китоби нашрдан чиққач эса қиз медиаоламда танилиб, кўплаб журналлар муқовасини безади. Ҳозирда 64 ёшли аёл пластик жарроҳлик клиникасининг расмий юзи ҳисобланади. Синди танасининг ўзгаришсиз қолган ягона қисми — бу пастки лабидир.

Валерия Лукьянова

Асли келиб чиқиши Одессадан бўлган 35 ёшли Валерия ўзини маъбуда ёки самовий мавжудот деб атайди. Қизиғи шундаки, тирик Барби ўзининг ташқи кўринишига жарроҳлар аралашувини қатъиян рад этади. Валерия ҳиндуизм, медитация ва ички хотиржамлик ҳақидаги блогларга қизиқади, лекин, асосан, модель сифатида ишлайди. Фотосессия ва тадбирлар учун қиз мураккаб макияждан фойдаланади, унинг сўзларига кўра, бундай макияжни фақатгина унинг ўзи қила олади. Аммо жарроҳларнинг айтишича, Лера қовурғаларни олиб ташлаш, липосакция, ринопластика, ҳейлопластика, блефаропластика ва ёноқ суякларини ўзгартириш каби операцияларни бошдан ўтказган.

Ҳанна Грегори

Британиялик талабанинг бел айланаси 55 см, кўзларини линза ёрдамида катталаштиради. Қизиғи шундаки, барча «тирик Барби»лар орасида Ханна ҳақиқатан ҳам ҳеч қандай операция қилдирмаган кам сонли қизлардан бири. Қиз Instagram юлдузига айланишидан олдин олинган фотосуратларини яширмайди ва уларда ҳам тубдан ўзгаришлар сезилмайди. Ҳанна Барби образида одамлардан яшириниш осонроқ, деб ҳисоблайди, чунки улар фақат қўғирчоқни кўришади ва у аслида ким эканлиги билан умуман қизиқмайди. «Мен уятчан ва одамови бўлиб улғайганман, менга доим қўғирчоққа ўхшашим ҳақида айтишарди. Қўғирчоқ образи орқали ташқи дунё билан алоқа қилишим осонроқ, чунки менда жуда кўп комплекслар бор», — дея тан олади Ҳанна.

Анастасия Шпагина

Касби визажист бўлган Анастасия ёшлигиданоқ анимеларни яхши кўрган. Оддий хобби бўлиб туюлган нарса шунчалик жиддийлашиб кетганки, қиз ҳатто ўзига Ник Фуккацуми тахаллусини ўйлаб топди ва ўзини «гуллар париси» деб атай бошлади. Пластик жарроҳлик ёрдамида у фақатгина кўз шаклини ўзгартирган, бошқа барча нарсалар моҳирона ва жуда мураккаб макияж натижасидир. Унинг айтишича, Анастасия эрталаб соат 5 да туради, образи учун 2 соатдан кўпроқ вақт сарфлайди. Аниме макияжсиз у уйдан чиқмайди, гўзаллик салонида ҳам у фақат аниме персонажи сифатида ишлайди. Анастасия вақти-вақти билан видеоблогида макияж қилиш бўйича кўрсатмаларни босқичма-босқич ўргатиб боради.

Лолита Ричи

Киевлик қиз 44 сантиметрлик белга эга ва у ҳам пластик жарроҳ аралашувини бутунлай рад этади. Бундан ташқари, у диета қилмаслигини ва спорт залларига ҳам қатнамаслигини таъкидлайди. Лолита — бу унинг тахаллуси бўлиб, унга театр актрисаси бўлган онаси танлаб берган. У қизининг агенти сифатида фотосуратларни интернетга жойлайди ва шу орқали оилавий бизнесини йўлга қўйган.

Дакота Роуз

Дакота АҚШда туғилган ва болалигиданоқ машҳур бўлишни орзу қилган. Бугун унинг орзуси амалга ошди: у интернетда машҳур бўлиб, уни доимий равишда суратга олиш ва намойишларда иштирок этишга таклиф қилишади. Пластик жарроҳлар операция қилдирганини инкор этадиган Дакотани бир неча бор фош этишга уринишган, аммо ҳеч ким қиз операция қилдирганини исботлай олмаган. Доимий парҳезлар, малакали макияж ва моҳирона фотошоп: Дакота ташқи кўринишини косметика ва компьютер ёрдамида тўғрилашини яширмайди.

Алина Ковалевская

Алина қуёш нурлари остида юрмайди, тери рангини сақлаб қолиш учун фойдали маҳсулотлар истеъмол қилади, оқсил, ёғ ва углеводлар балансига амал қилади. Шунингдек, у сочларини вақти-вақти билан янгилайди, чунки қизнинг айтишича, ҳақиқий сочлари у қадар кўркам эмас. Бироқ бошқа тирик қўғирчоқлардан фарқли равишда Алина ўзининг ташқи қиёфаси ёрдамида пул ишлаш ва модель бўлишни хоҳламайди: қиз институтни тугатиб, мутахассислиги бўйича ишлашни режалаштирмоқда. Лекин қайси йўналиш бўйича эканлигини ошкор қилмайди.