Ҳамиша подиумларда ҳаракатланадиган моделлар ажойиб кўринишда бўлади. Бундай натижага эришиш учун улар ўзларига қандай ғамхўрлик қилишини қуйида билиб олиш мумкин.
Линейси Монтеро
«Мен шакар ва гул асалини аралаштириб, терига сураман. Қўл билан массаж қиламан. Тўғриси, бундан яхши скрабни топиш қийин. Жараёндан сўнг дарҳол намлантирувчи кремдан фойдаланаман. Мода ҳафталигидаги ортиқча бўянишдан кейинги биринчи қиладиган ишим шу. Бу терининг қайта тикланишига ва дам олишига ёрдам беради».
Марта Хант
«Мен ҳар доим япон аёлларига ‘ҳасад қиламан’. Сабаби уларнинг деярли барчаси мукаммал терига эга. Шунинг учун ҳам косметикалар танлашда аввал япон брендларини кўриб чиқаман. Натижада SК II ниқобларида тўхтадим, улар 100 фоиз пахтадан тайёрланган. Таркибида витамин, антиоксидантлар, минерал ва органик кислоталар мавжуд».
Грета Валезе
«Мен тери парваришини бир қанча маҳсулотлар ёрдамида алоҳида маросимга айлантирдим. Эрта тонгда ювилган юзимни аввал сут билан тозалайман. Сўнгра тоник, зардоб ва намлантирувчи кремлардан фойдаланаман. Ҳар бир жараён тахминан уч дақиқа давом этади, чунки ҳар бир восита тери қатламига кириб бориши керак. Ухлашдан аввал ҳам худди шу жараённи такрорлайман. Шунингдек, ҳафтада бир маротаба тери тешикларини очиш учун махсус буғлантираман. Бироздан сўнг намлантирувчи ниқобларни қўллайман».
Уиллоу Хенд
«Дермалогиcа брендининг ғояси дастлаб мени ҳайрон қолдирган эди. Чунки унда юз махсус қисмларга ажратилади. Ҳар бир қисм учун алоҳида восита танланади. Мен ушбу жараён учун салонга мурожаат қиламан. Сўнгра мутахассислар пешона, ёноқ, ияк ва бошқа қисмларим учун мос равишда воситалар таклиф этади. Айниқса, бу мода ҳафталигидан сўнг мен учун жуда катта ёрдам бўлади».
Эш Уокер
«Мен доимо намлантирувчи воситадан фойдаланаман. Эҳтимол, ҳар икки соатдадир. Агар шундай қилмасам, юзимни ажин босиб кетаётганга ўхшайди. Подиумдан ташқарида умуман пардоз қилмайман, сабаби юз териси мода ҳафталигида керагидан ортиқ даражада чарчайди».
Рената Зандонади
«Bioderma брендининг чинакам мухлисасиман. Сабаби унда ажойиб тозаловчи ва намлантирувчи воситалар мавжуд. Воситалар таркибида ҳеч қандай хушбўй ҳид ёки қўшимча ингредиэнтлар мавжуд эмас. Мен доимо, қуёш ёки ёмғирли об-ҳавода ҳам мазкур воситалардан фойдаланаман. SPF крем суриш эса худди тишларимни ювишдек муҳим».
Жессика Барта-Лем
«Кечки пайт юзимни, албатта, зайтун мойи билан тозалайман. У терини лосьон, кўпик ёки бошқа воситаларга қараганда яхшироқ тозалайди. Табиий маҳсулотдан кейин терининг зарарланиши ҳақида ўйлашнинг ҳам кераги йўқ. Намлантирувчи воситам ҳам зайтун мойига асосланган бўлиб, уни дорихонага буюртма бераман. Унинг сақлаш муддати икки кун бўлса-да, сифати ва натижаси ишончли».
Жулия ван Ос
«Одатда юзимда вазелинли ниқоб билан ухлайман. Бунинг учун шунчаки вазелинни юзга суриш кифоя. Эрталаб эса тери ҳайратланарли даражада силлиқ ва юмшоқ бўлади. Бундай натижани бошқа ҳеч қандай восита бера олмайди».
Паулин Хоро
«Мен жуда кўп сув ичаман. Балки 2 литрдан ҳам кўпроқдир. Зарарли, қовурилган ёки консерваланган ҳеч нарса истеъмол қилмайман. Ҳар ойда косметолог ҳузурига ташриф буюраман. Уйда эса намлантирувчи воситадан ташқари ҳеч қандай косметик воситаларим йўқ».
Исауни Брито
«Мен, аслида, косметик воситаларга эмас, табиийликка имкон бераман. Пардоздан кейин юзни ювиб, бўёқларни бодом ёғи билан тозалайман. Сўнгра авокадо ниқобини сураман. Бунинг учун мевани шунчаки блендердан ўтказиш ва юзга юпқа қатлам қилиб суриш кифоя. Бор-йўғи шу».
Изоҳ (0)