Қуруқ ёки ёғли тери учун қандай воситадан фойдаланиш яхшилиги ҳақида маълумот бериб ўтамиз.
Компакт пудра
Юзни юпқа қоплайдиган, аммо шу билан бирга, ҳуснбузар ва қизаришларни яширмайдиган компакт пудра терисида кўзга яққол ташланадиган муаммо бўлмаган қизлар учун айни муддао. Ёғли тери учун тавсия қилингани билан, ундан фойдаланишда ҳам меъёрни билиш керак. Йўқса, терини ҳаддан ортиқ қуритиши мумкин. Юзида кўзга ташланадиган ажинлари бор хотин-қизлар эса ундан фойдаланмагани яхши. Чунки у ажинларга ортиқча урғу бериб, янада кўпроқ эътибор тортиши мумкин. Суртганда бурун ва кўз бурчагидаги складкаларга диққатли бўлинг.
Уқаланадиган пудра
Аксарият ҳолларда макияжни якунлаш учун тональ кремдан кейин фойдаланиладиган пудра минерал асосдан тайёрлангани сабаб ҳам яллиғланиши бор, қизарган ва тошмали тери учун фойдаланса бўлади. Компакт пудрадан фарқли равишда у терига силлиқ ётиб, ажин ва складкаларга урғу бермайди. Юздаги ялтирашни бартараф қилишда ушбу восита яхши самара беради.
Тональ крем
Исталган қизариш ажин ва доғларни яшириши мумкин бўлган тональ крем ёғли ва қуруқ юз териси учун ҳам тўғри келади. «Матовий» тональ крем юздаги ялтирашни яшириш ва тиниқ кўрсатиш хусусиятига эга. Тональ кремнинг намлантирувчи варианти эса қуриган терини намлантиради ва соғлом кўрсатади.
Тонал флюид
Асосида сув бисёр бўлган тонал воситанинг афзаллиги юздаги исталган муаммони яширишида. Бир қарашда мукаммалдек кўринган ушбу флюиднинг ҳам кичик бир камчилиги бор — у ҳаддан ортиқ қуруқ тери учун тўғри келмайди. Юздаги муаммоларни яширгани билан, кулганда лаб атрофидаги складкалар кўзга шундоқ ташланади.
Стик
Ҳаддан ортиқ қуюқ бўлгани учун ҳар куни фойдаланиб бўлмайдиган мазкур восита ниқоб сингари юздаги барча камчиликни яширади. Ҳуснбузарларни яшириш эмас, даволаш кераклиги рост, аммо шошилинчда стикдан фойдаланиш яхши самара беради. Бунинг учун воситадан аввал кафтингизга бироз олиб, кейин бармоқ билан юзингизга суртинг. Тананинг ҳарорати ҳисобига бир текисда суртилиб, юзда анча табиий кўринади.
Изоҳ (0)