Макрон Париж яқинида полициячининг ўлдирилишини диний экстремизм деб атади

Франция президенти Эммануэль Макрон Париж ташқарисидаги Рамбуе шаҳарчасида полиция ходимининг ўлдирилишини диний экстремизмнинг намойиши деб атади. Бу ҳақда «РБК» хабар берди.

«Стефани Рамбуе комиссариатида ишлар эди. Бутун миллат у томонда, полиция томонда. Биз ҳеч қачон диний экстремизмга қарши курашда таслим бўлмаймиз», — деб ёзди Макрон ўзининг Twitter саҳифасида.

Жиноят жойига етиб келган ҳукумат раҳбари Жан Кастекс содир бўлган воқеани жоҳиллик ва қўрқоқлик деб атади ҳамда гап теракт ҳақида кетаётганини айтди.

Ивелин департаментининг тергов-суриштирув органлари ушбу жиноят ишини Терроризмга қарши кураш миллий прокуратурасига топширди.

Ўз навбатида, Париж ва Рамбуени ўз ичига олувчи Ил де Франц ҳудудининг раҳбари Валери Пекресс содир бўлган воқеанинг бир нечта версиялари, шу жумладан, теракт ўрганиб чиқилаётганини маълум қилди.

Қотиллик полиция участкасининг кираверишида содир этилган. Жиноятчи бинога кираётган аёлга ҳужум қилиб, унинг томоғига пичоқ урган. Бошқа полиция ходимлари жиноятчига қарата ўқ узган ва у воқеа жойида ҳалок бўлган.

Жиноятчининг шахсига ҳали аниқлик киритилмади. Маълумотларга кўра, у Тунис фуқароси бўлган, Францияга эса 2009 йилда келган.

Эслатиб ўтамиз, Францияда тарих фани ўқитувчиси ўқувчиларга Charlie Hebdo нашри томонидан чоп этилган Пайғамбар Муҳаммад (с.а.в.)нинг карикатура суратини кўрсатган. Шундан сўнг ўқитувчи чеченистонлик муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.

Макрон бу қотилликни «Ислом террорчилигига хос хатти-ҳаракат» деб атади. У, шунингдек, Ислом дини «бутун дунёда инқироз ҳолатини бошдан кечираётгани» ҳақида фикр билдирди.

Макроннинг бу гаплари кўплаб давлатларда мусулмонларнинг ғазабига сабаб бўлди. Улар Франция ва Макронга қарши норозиликлар билдира бошлади. Баъзи намойишчилар Франция байроғи ва Макроннинг суратларини топтаган. Бундай норозилик акциялари Покистон, Ливан, Туркия, Фаластин ва бошқа давлатларда бўлиб ўтди.

Кейинчалик Макрон Муҳаммад (с.а.в.) карикатуралари туфайли мусулмонларда пайдо бўлган ҳис-туйғуларни тушунишини айтди, аммо уларни ҳукумат эмас, мустақил ОАВлар чиқараётганини таъкидлади.