АҚШ Индонезиянинг Бали ороли яқинида бедарак йўқолган KRI Nanggala-402 сувости кемасини қидиришда ёрдам бериш учун самолётлар юборади. Бу ҳақда Пентагон вакили Жон Кирбига таяниб, «РБК» хабар берди.
«Биз Индонезия сувости кемаси йўқолгани ҳақидаги янгиликлардан, Индонезия денгизчилари ва уларнинг оилалари ҳолидан чуқур қайғу чекдик. Индонезия ҳукуматининг таклифига биноан йўқолган сувости кемасини қидиришда ёрдам бериш учун ҳаво воситаларини жўнатяпмиз», — деб ёзган у.
Индонезия ҳарбий денгиз кучлари штаби раҳбари адмирал Юдо Маргононинг айтишича, бедарак йўқолган сувости кемасини қидиришга 3 та сувости кемаси, 5 та самолёт ва 21 та ҳарбий кема жалб қилинган. Сингапур ва Малайзия ҳам қидирув-қутқарув ишларида ёрдам бермоқда.
Маргононинг қўшимча қилишича, кемада экипажнинг барча аъзолари учун 24 апрель соат 03:00 гача (24 апрель куни Тошкент вақти билан 23:00 гача) етадиган кислород бор эди.
Эслатиб ўтамиз, Индонезиянинг ҳарбий денгиз кучларига тегишли бўлган, Германияда ишлаб чиқарилган KRI Nanggala-402 сувости кемаси торпедалар билан машғулот ўтказган, лекин натижалар ҳақида хабар бермаган. Тахминларга кўра, Балидан 96 километр шимолда алоқа узилиб қолган. Денгиз ости кемасида 53 киши бор эди.
Кейинчалик мамлакат мудофаа вазирлиги индонезиялик қутқарувчилар сув ости кемасининг алоқа узилмасдан олдин жойлашган жойи яқинида нефть изларини аниқлади.
Бироқ, Индонезия денгиз кучлари вакили Аҳмад Ар-Риёднинг сўзларига кўра, кемани топишда бу етарли эмас.Унинг таъкидлашича, топилган нефть «кема сузувчанлигини сақлаб қолиш учун экипаж томонидан атайлаб тўкилган бўлиши мумкин».
Аввалроқ Россиянинг Отрадной шаҳридаги «Пелла» кемасозлик заводида қурилаётган «Скорпион» траулери (балиқ овлаш кемаси) синовлар пайтида ағдарилиб кетгани ҳақида хабар берилганди. Ҳодиса содир бўлган пайтда траулер бортида 80 киши бўлган, 78 нафар ишчи «зудлик билан эвакуация қилинган». Шунингдек, ҳодиса оқибатида траулернинг бир эркак ва бир аёл ходими ҳалок бўлгани ҳақида хабар қилинди.
Изоҳ (0)