Россиялик сиёсатчи, айни вақтда қамоқхонада жазони ўтаётган Алексей Навальний Instagram’даги саҳифасида Россия бўйлаб уни қўллаб-қувватлаш мақсадида ўтказилган норозилик намойишларига ўз муносабатини билдирди, деб ёзмоқда Meduza.
«Ёнимга келган адвокат кеча содир бўлган воқеалар ҳақида гапириб берди. Чин дилдан шуни айтишим мумкинки, ҳозир мени иккита туйғу — ғурур ва умид жўшқинлантирмоқда. Шундай катта ва ажойиб ҳаракатнинг бир қисми эканимдан ғурурланаман. Сизлардек ҳалол одамлардан бири адолатсизлик ва қонунларга бўйсунмаслик ҳолатларига индамай чидаб турмаётгани мени қувонтирди. Умид нимадан пайдо бўлгани ҳам тушунарли. Энди Россия қутқариб қолиниши мумкин. Норозиликка чиққанлар, сизлар мамлакатни қутқарасиз. Кўчаларга чиқмасдан ушбу ҳаракатни қўллаб-қувватлаганлар ҳам тўғри қилган. Ҳатто иккисини қилмай, вазиятга ачинганлар, қалбан ҳамдардлик билдирганларга ҳам раҳмат айтаман», — дея ёзган Навальний.
Навальний Россиянинг айни пайтда зулматга чўмгани ва муайян вақт давомида аҳвол жуда оғир бўлишини таъкидлаган.
«Бироқ Россияни ортга тортаётганлар тарихан маҳв этилди. Биз барибир кўпчиликмиз. Россия, албатта, бахтли мамлакатга айланади», — деган сиёсатчи.
21 апрелда Россияда «Навальнийга озодлик» номли норозилик намойишлари ўтказилди. Сиёсатчининг тарафдорлари Навальнийнинг шифокорлари унинг соғлиғи ёмонлашганини хабар қилганидан кейин мамлакатдаги одамларни кўчаларга чиқиб, норозилик намойишларини ўтказишга чорлади. Шифокорларнинг маълумотидан кейин Россия прокуратураси Навальнийга алоқадор ташкилотларни экстремистик гуруҳлар рўйхатига киритишни талаб қилган.
«ОВД-Инфо» берган маълумотларга кўра, Россиянинг 99 та шаҳрида ўтказилган норозилик намойишларидан кейин 1900 нафардан зиёд одам ҳибсга олинган. Аввал Бутун Россия бўйлаб Навальнийни қўллаб-қувватлаб ўтказилган акцияларда 1700 га яқин одам ҳибсга олингани хабар қилинганди. Энг кўп, яъни 825 нафар киши Санкт-Петербургда ҳуқуқ-тартибот идораларининг ходимлари томонидан ушланган.
Изоҳ (0)