АҚШда Оқ уй спикери Жен Псаки Россия президенти Владимир Путиннинг «қизил чизиқлар» ҳақидаги баёнотларига изоҳ бериб, АҚШ бу сўзларни ўзига олмаслигини айтди. Бу ҳақда «Korrespondent.net» хабар берди.
Бир кун олдин Путин парламентга мурожаат йўллаш чоғида бошқа мамлакатларни Россия билан муносабатларда «қизил чизиқлар»дан ўтмаслик ҳақида огоҳлантирди. Акс ҳолда, «Россия провокаторларга ассиметрик жавоб бериш ҳуқуқини ўзида сақлаб қолади».
«Ўйлашимча, президент Путин айтаётган гапларни АҚШ шахсан бизга тегишли деб қабул қилмайди», — деб жавоб берди у.
Псаки, шунингдек, АҚШ Россиянинг зарарли хатти-ҳаракатлари оқибатида янги санкцияларни жорий қилганини эслатиб ўтди.
«Биз ҳеч қачон бир қатор санкциялар хатти-ҳаракатни дарҳол ўзгартиради деб кутмаганмиз ва буни олдиндан башорат ҳам қилмаганмиз, аммо санкциялар Россиянинг хатти-ҳаракатлари қабул қилиниши мумкин эмаслиги ва уларнинг давом этишига йўл қўйилмаслиги тўғрисида аниқ сигнал беради», — деди у.
Шу билан бирга, Псаки Вашингтон Москва билан барқарор ва олдиндан айтиб бўладиган муносабатларни ўрнатиш истагида эканини қўшимча қилди. АҚШ президенти Жо Байден Путин билан телефон орқали суҳбатда бунга ишора қилган.
Путин «қизил чизиқлар» билан нимани назарда тутганини унинг матбуот котиби Дмитрий Песков қуйидагича изоҳлади: «Аввало, бу бизнинг миллий манфаатларимиз, ташқи ва ички хавфсизлигимиз манфаатларига ҳамда бизнинг сайловларга ёки бошқа сиёсий жараёнларга четдан кимдир аралашишига йўл қўймаслик дегани. Бу бизнинг мамлакатимиз билан тажовузкор мулоқотнинг олдини олиш, мамлакатимиз иқтисодий манфаатларининг бузилишига йўл қўймаслик ва бошқаларни англатади».
Изоҳ (0)