Forbes энг бой россияликлар рейтингини эълон қилди. Алишер Усмонов унда 7-ўриндан жой олди

Forbes Россиядаги энг бой ишбилармонларнинг йиллик рейтингини эълон қилди. Биринчи ўрин «Северсталь» эгаси Алексей Мордашовга насиб қилди, унинг бойлиги нашр томонидан 29,1 миллиард долларга баҳоланди. Бир йил олдин Мордашов 16,8 миллиард доллар билан тўртинчи ўринни эгаллаган эди.

2020 йилги рейтинг етакчиси, «Норникель» раҳбари Владимир Потанин 27 миллиард доллар билан бу сафар иккинчи ўринга тушиб кетди (бир йил олдин — 19,7 миллиард доллар). Учинчи ўринни «Новолипецк» металлургия комбинати эгаси Владимир Лисин эгаллади — 26,2 миллиард доллар.

Тўртинчи ўринда «Лукойл» раҳбари Вагит Алекперов (24,9 миллиард), бешинчи ўринда «Новатек» компанияси асосий эгаси Леонид Михельсон (24,9 миллиард), олтинчи ўринда «Новатек» ва «Сибур» компаниялари директорлар кенгаши аъзоси Геннадий Тимченко (22 миллиард) турибди.

Рейтингда USM Holdings асосчиси ва бош акциядори Алишер Усмонов еттинчи ўриндан жой олди. Forbes маълумотларига кўра, 67 ёшли тадбиркорнинг бойлиги йил давомида сезиларли даражада ўсган — 13,4 миллиарддан 18,4 миллиард долларгача. Саккизинчи ўрин «Еврохим» ва СУЭК компаниялари эгаси Андрей Мельниченкога насиб қилди (17,9 миллиард).

Telegram асосчиси Павел Дуров биринчи марта рейтингдаги кучли ўнликка кирди. 17,2 миллиард бойлиги билан у тўққизинчи ўринни эгаллади. 2020 йилда Дуров атиги 30-ўринда эди ва унинг активлари 3,4 миллиардга баҳоланган. Ўнинчи ўриндан Федерация кенгаши аъзоси Сулаймон Каримов жой олди (15,8 миллиард).

Жами рўйхатга Forbes маълумотлари бўйича бойлиги 550 миллион доллардан ошадиган 200 нафар энг бой бизнесменлар киритилган.

Forbes’нинг 6 апрелда эълон қилинган йиллик глобал рейтингида Amazon асосчиси Жефф Безос 177 миллиард долларлик бойлик билан биринчи ўринни эгаллаб турибди. Иккинчи ўрин Tesla раҳбари ва SpaceX асосчиси Илон Маскка (151 миллиард), учинчи ўрин Louis Vuitton Moet Hennessy раҳбари Бернард Арнога (150 миллиард) насиб этди.

Павел Дуров дастлаб глобал Forbes рейтингига ҳозирда у яшаётган Бирлашган Араб Амирликларининг вакили сифатида киритилган эди. Кейинчалик рейтинг яратувчилари тузатиш киритиб, уни Россия мамлакати вакили сифатида кўрсатди.