Россия Қуролли кучларининг Қримдаги ҳарбий машғулотларида 10 мингдан ортиқ аскар, 1200 та қурол ва ҳарбий техника, шунингдек, 40 дан ортиқ ҳарбий кема иштирок этмоқда. Бу ҳақда Meduza хабар берди.
Россия Мудофаа вазирлигининг хабар беришича, 22 апрель куни Қримдаги Опук полигонида кутилмаган тарзда жанговар тайёргарликни текшириш доирасида жанубий ҳарбий округ кучлари ва ҳаво-десант кучлари машғулотларининг асосий босқичи бўлиб ўтади.
Таъкидланишича, машғулотлар Қора денгиз флоти ва Россия денгиз флотининг Каспий флотилияси таркибига киритилган.
Машғулотлар давомида Қора денгиз флотининг «Адмирал Макаров» ва «Адмирал Эссен» фрегатлари Қрим қирғоғига тушадиган денгиз десантига ёрдам сифатида ўт очади. «Денгиз артиллериясининг ўт очишини созлаш фрегатлар палубасидан учирилган учувчисиз ҳаво воситаларининг ҳисоб-китоблари билан таъминланган», — дея Мудофаа вазирлиги машғулотнинг ушбу қисмига изоҳ берди.
Эслатиб ўтамиз, Wall Street Journal (WSJ) газетаси Россиянинг Қрим ва Воронеж вилоятидаги ҳарбий техникаларининг сунъий йўлдошдан олинган суратларини чоп этди. Нашрнинг таъкидлашича, сунъий йўлдош тасвирлари орқали Россия Украина билан чегарада илгари тахмин қилинганидан кўра кўпроқ жанговар самолётларни жойлаштирганини кўриш мумкин.
20 апрель куни Владимир Зеленский ўзининг Telegram каналига жойлаштирилган видеомурожаати орқали Путинни Донбассда учрашишга таклиф қилди. Шу билан бирга, у Украина урушни хоҳламаслигини, аммо бунга тайёрлигини таъкидлади. Москва Зеленскийнинг Путин билан Донбассда учрашиш таклифига жавоб қилди.
Байден ва Ангела Меркель Россияни Украина билан чегарадаги қўшинларини олиб кетишга чақирди. Украина президенти Владимир Зеленский Россияни «жиловлаш»да Байдендан ёрдам сўради. Кремль эса Россия ва Украина ўртасидаги уруш эҳтимолини истисно қилди.
Изоҳ (0)