Марказий Осиё давлатлари АҚШ фуқароларининг ташриф буюриши тавсия этилмаган мамлакатлар рўйхатига киритилди. Бу ҳақда АҚШ Давлат департаменти ҳисоботига таяниб, Deutsche Welle хабар берди.
Хабарга кўра, АҚШ саёҳат қилиш тавсия этилмаган давлатлар рўйхатига дунё мамлакатларининг тахминан 80 фоизини киритишни режалаштирмоқда. Давлат департаменти тўртинчи даражали хавфли давлатлар қаторига 34 та мамлакатни қўшди. Рўйхатда, хусусан, Ўзбекистон, Қозоғистон, Қирғизистон, Туркманистон, Тожикистон, Россия, Хитой, Сингапур, Эрон, Бразилия, Аргентина, Мозамбик, Чад, Косово, Кения ва Танзания каби давлатлар бор. Шунингдек, унга яна 130 дан ортиқ мамлакат киритилади.
«Рўйхатнинг янгиланиши саёҳат қилмаслик тавсияси билан тўртинчи даражали хавфли мамлакатлар сонининг сезиларли даражада кўпайишига олиб келади, бу дунёдаги мамлакатларнинг 80 фоизини қамраб олади», — дейилади АҚШ Ташқи ишлар вазирлиги баёнотида.
COVID-19 чекловлари туфайли илгари америкаликлар учун аксарият Европа давлатларига саёҳат қилиш тақиқланган эди. Бундан ташқари, Вашингтон яқин орада Европа, Хитой, Бразилия, Эрон ва Жанубий Африка давлатларида бўлган Америка фуқаролигига эга бўлмаган кишиларни АҚШга кириш ҳуқуқидан маҳрум қилди.
Таъкидланишича, бундай тадбирлар саёҳатчиларнинг соғлиғи билан боғлиқ масалалар бўйича АҚШ тиббий назорат органларининг ички тавсияларини яхшироқ бажариш учун амалга оширилмоқда
АҚШ касалликларни назорат қилиш ва олдини олиш маркази (CDC) ҳозирча вазиятга изоҳ бермади.
Аввалроқ Қўшма Штатларда коронавируснинг тўртинчи тўлқини юз бераётгани маълум қилинганди. Маълумотларига кўра, АҚШда коронавирусга чалинганларнинг умумий сони 28 миллиондан ошади, COVID-19 қурбонлари сони учта урушдаги йўқотишлардан ошиб кетган. Шу муносабат билан, февраль ойи охирида Байден коронавирусдан вафот этган америкаликлар учун беш кунлик мотам эълон қилди.
Изоҳ (0)