Чехия парламенти Сенати ҳукумат томонидан Россия бош разведка бошқармаси ташкиллаштирганликда айбланаётган Врбетицедаги портлашларни «Европа Иттифоқи аъзоси бўлган давлатга қарши, демак бутун Евроиттифоққа қарши давлат терроризми акти» деб атади. Бу ҳақда Чехия ахборот агентлигига таяниб, Meduza хабар берди.
Агентлик хабарига кўра, Сенатнинг 72 аъзосидан 67 нафари тегишли қарорни маъқуллаб, овоз берган.
Сенаторлар, шунингдек, Чехия ҳукуматини Россия билан дўстона муносабатлар ва ҳамкорлик тўғрисидаги шартномани бузишга ва Россиянинг Прагадаги элчихонасида фақат бир нафар россиялик дипломатни қолдиришга чақирди.
Бундан ташқари, Сенат аъзолари Врбетицедаги воқеани БМТ Хавфсизлик Кенгаши, НАТО ва Европа Иттифоқининг бошқарув органлари даражасида муҳокама қилишга, Россиядан товон пули талаб қилишга ва Россияни атом электр станцияси ҳамда бошқа муҳим инфратузилмаларни қуриш бўйича тендерлардан четлатишга чақирди.
Аввалроқ Депутатлар палатаси (Чехия парламентининг қуйи палатаси) ҳам Чехия ҳукуматини шундай чоралар кўришга чақирган эди.
2014 йил Врбетице қишлоғидаги ўқ-дорилар омборларида содир бўлган портлашлар операциясига Россия разведка бошқармасининг 29155-сонли ҳарбий қисм бошлиғи, генерал Андрей Аверянов шахсан раҳбарлик қилгани ҳақида The Insider ва Bellingcat агентликлари томонидан ўтказилган суриштирувида маълум қилинди.
Аввалроқ Чехия расмийлари разведка хизматида ишлаганликда гумон қилинаётган Россия элчихонасининг 18 нафар ходими мамлакатдан чиқариб юборилиши ҳақида эълон қилди. Россия айбловларни бемаъни ва асоссиз деб атади ва Чехиянинг хатти-ҳаракатларига жавоб сифатида 20 нафар чехиялик дипломатни мамлакатдан чиқариб юборди.
Изоҳ (0)