Жанубий Корея ҳарбийлари 4 августдан бошлаб Шимолий Корея билан чегарада ўрнатилган радиокарнайларни олиб ташлашни бошлади. Бу ҳақда Корея Мудофаа вазирлиги хабар берди.
Ушбу радиокарнайлар шимолга қарата тарғибот эшиттиришларини олиб бориш учун ўрнатилган эди.
Қуролли кучлар шимолга эшиттириш учун мўлжалланган радиокарнайларни олиб ташлашни бошлади. Бу армиянинг жанговар қобилиятига таъсир қилмайди, жануб ва шимол ўртасидаги кескинликни камайтиришга ёрдам берадиган амалий чора бўлади, деди вазирлик расмий вакили ўринбосари Ли Гён Хо.
У Шимолий Корея билан бу борада дастлабки келишув бўлмаганини айтди. Ли Гён Хо 2-3 кун ичида барча стационар ускуналар демонтаж қилинишини таъкидлади. Чегара ҳудудларида 20 га яқин овоз кучайтиргичлар мавжуд. Жанубий Корея ҳарбийлари ҳозирда КХДР ўз карнайларини олиб ташлаётгани аломатларини кўрмаяпти.
11 июнь куни Жанубий Кореянинг янги президент Ли Чже Мён ушбу карнайлар орқали шимолга қарата олиб борилган тарғиботни тўхтатишни буюрган эди. Бунга жавобан, Шимолий Корея ҳам ўз тарафидаги шовқинли узатишларни тўхтатди.
21 июлда эса Жанубий Корея разведкаси шимолга қарата ишлаган бир нечта радиосигналларни тўхтатди. Бу радиостанциялар ўн йиллар давомида Шимолий Корея аҳолисига мурожаат қилиб келган эди. Ли Чже Мён, июнь бошида президентлик лавозимини эгаллаганидан бери, аввалги раҳбарлардан фарқли ўлароқ, Пхеньян билан мулоқот тарафдори бўлиб қолмоқда.
Изоҳ (0)