АҚШнинг Нью Жерси штати қирғоқларида кичик моторли қайиқ билан тўқнашган минке турига мансуб кит ҳалок бўлди. Тўқнашув оқибатида қайиқ деярли ағдарилиб, бир киши сувга тушиб кетган. Бу ҳақда AP News хабар берди.
Воқеа 2 август куни Барнегат кўрфази яқинида содир бўлган. Ижтимоий тармоқларда тарқалган видеода 6 метр узунликдаги кит моторли қайиққа бориб урилгани ва кейинроқ сузиб кетгани акс этган. Зарба кучидан қайиқдаги бир одам сувга тушиб кетган.
Орадан кўп ўтмай кит яқин атрофдаги қумли оролда ўлик ҳолда топилган. Денгиз ҳайвонларини қутқариш, даволаш ва табиатга қайтариш билан шуғулланувчи Marine Mammal Stranding Center ташкилоти ҳодисага муносабат билдириб, тўлқин ва сув сатҳи сабабли китга яқинлаша олмаганини айтган.
“Ҳозирча кўп нарса дея олмаймиз. Китда яққол жароҳат излари йўқ. Аммо синчиклаб текшириш имконимиз йўқ”, деди ташкилот координатори Жей Пагел.
Пагелнинг айтишича, видеодаги тўқнашувдан аввал китда бошқа жароҳатлар бўлгани ҳам тахмин қилинмоқда. Интернетда тарқалган бошқа бир видеода балиқнинг бошқа қайиқ билан ҳам тўқнашгани тасвирланган. Кит жасади 4 август куни соҳилдан олиб кетилиб, ўлим сабабини аниқлаш мақсадида махсус текширув — некропсия ўтказилади.
Изоҳ (0)