Арманистон бош вазири Никол Пашиняннинг мамлакат жанубидаги Агардак шаҳрига ишчи сафари чоғида бир неча юзлаб маҳаллий аҳоли унинг ташрифига қарши норозилик намойиши ўтказди. Намойиш маҳаллий янгиликлар порталлари томонидан реал вақтда намойиш этилди, деб ёзади «ТАСС».
Арманистоннинг энг жанубий шаҳридаги норозилик намойишлари Пашиняннинг ташрифидан кейин бошланди. Шаҳар аҳолиси марказга йиғилиб, Пашиняндан ўтган кузда Тоғли Қорабоғдаги можаро зонасида жанговар ҳаракатлар пайтида ҳалок бўлганлар дафн этилган маҳаллий қабристонга ташриф буюрмасликни талаб қилди. Одамлар йўлни тўсиб қўйди. Полициянинг аралашувига қарамай, бош вазир тўсиқдан ўтолмади. Намойишчилар ҳукуматга қарши шиорлар айтиб, Пашинянни «Озарбайжонга таслим бўлганликда» айблади. Шундан сўнг Пашинян шаҳарни тарк этди.
«Уларнинг бундай хулқ-атвори учун узр сўрайман», — деди Пашинян мегафонда. Бир неча ўн метр юриб, машинага ўтирди ва жўнаб кетди, дейилади хабарда.
Агаракдан кейин Пашинян Эрон билан чегара яқинида жойлашган Мегри шаҳрига келди, у ерда ҳам бир неча юзлаб маҳаллий аҳоли уни норозилик акциялари билан кутиб олди ва ҳудудни тарк этишни талаб қилди.
«Спутник Армения» хабарига кўра, Мегрида бош вазирнинг тарафдорлари ва мухолифлари ўртасида жанжал келиб чиққан.
Хабарга кўра, норозилар билан бир қаторда айрим кишилар Пашинянни қўллаб-қувватлаш учун йиғилган. Уларнинг ўртасида жанжал келиб чиққан, аммо хавфсизлик кучлари уларни ажратишга муваффақ бўлган. Жанжал пайтида Давлат хавфсизлик хизмати раҳбари Саркис Ованнисяннинг курткасини йиртиб ташлашган. Таъкидланишича, бош вазирнинг Мегрига ташрифи ҳақида олдиндан эълон қилинмаган эди.
Намойишчилар ҳукумат бошлиғини «капитуляцияга имзо чеккан» ва Арманистон ерларини таслим этганликда айблаб, шиорлар айтди.
Маҳаллий янгиликлар порталларида реал вақтда кўрсатилишича, ҳукумат раҳбари қўриқчилар қуршовида машинага ўтириб, ҳудуддан чиқиб кетган. «Мегри аҳолиси бизнинг еримизни топширган одам бизнинг шаҳар атрофида бемалол юра олмаслигини намойиш қилди», — деди намойишчилардан бири.
Кейин эса Пашинян Капан шаҳрига етиб келди, у ерда ҳам бир гуруҳ аҳоли уни норозилик ҳаракати билан кутиб олди. Ҳукумат раҳбари кучайтирилган хавфсизлик ёрдамида маҳаллий маъмурият биносига кирган.
«Никол, сен бизнинг ерларимизни бериб юбординг!» деб бақирган намойишчилар. Айни пайтда вазирлик раҳбарининг полиция ва хавфсизлик ходимлари маъмурият биноси жойлашган ҳудудни ўраб олган.
Арманистонда Пашинян ва унинг ҳукуматига қарши норозиликлар ўтган йилнинг 9 ноябридан сўнг бошланди. Ўшанда бош вазир Россия президенти Владимир Путин ва Озарбайжон президенти Илҳом Алиев билан биргаликда Тоғли Қорабоғ атрофидаги можаро зонасида ҳарбий ҳаракатларнитўхташ тўғрисида уч томонлама баёнот имзолаган ва минтақада 27 сентябрда бошланган жанговар ҳаракатларга нуқта қўйилган эди. Мухолифат бош вазирни ушбу воқеалар натижаси учун жавобгар қилди.
Ички сиёсий инқирозни ҳал қилиш учун Пашинян мамлакатда 20 июнь куни муддатидан олдин парламент сайловлари ўтказилишига ва сайловлар ўтказилиши учун апрелда истеъфога чиқишга ваъда берди. Аввалроқ Арманистонда сентябрдан буён амал қилиб келган ҳарбий ҳолат бекор қилингани ҳақида хабар берилганди.
Изоҳ (0)