Россия президенти Владимир Путин Федерал Мажлисга ўзининг 17-мурожаатини ўқишни бошлади. Тадбир «Манеж» марказий кўргазма залида бўлиб ўтмоқда, деб ёзади «РБК».
Тадбирнинг асосий мавзуси пандемия таъсирида бўлган иқтисодиёт ва фуқароларни қўллаб-қувватлашга қаратилган тизимли чора-тадбирлар бўлиши кутилмоқда.
Путин ўз нутқини COVID-19 эпидемиясининг бошланиши ҳақидаги хотиралар билан очди. У ҳар доим коронавирус пандемияси келтириб чиқарган синовларни муваффақиятли енгиб ўтишга ишонганини айтди. Шу билан бирга, у россияликларни ҳушёрликни йўқотмасликка, эҳтиёт чораларини кўришга ва вирусга қарши эмланишга чақирди. «Коронавирус ҳали тўлиқ мағлуб этилмаган, бу эса тўғридан-тўғри таҳдид бўлиб қолмоқда», — деди президент.
«Мен бошқа давлатлар раҳбарларидан шундай баҳони тез-тез эшитганман: биз мутлақ ноаниқлик билан иш кўряпмиз. Бу ҳақиқатан ҳам шундай эди», — деди президент. Шундан сўнг, у касалхоналардаги оғир вазият ва кислород етишмаслигини, дўконда озиқ-овқат тақчиллиги ҳақида эслади.
Шундан кейин Путин Россиянинг энг юқори миллий устувор вазифаси нима эканини айтди. «Россия халқини ҳимоя қилиш мамлакатнинг энг муҳим миллий устувор вазифасидир», — деди Президент.
Ушбу устувор вазифа янгиланган Конституциянинг барча қоидаларида акс этган, деди Путин. «Оилани ҳимоя қилиш тўғрисида, ота-оналарнинг болаларни тарбиялашдаги энг муҳим роли тўғрисида, ижтимоий кафолатларни кучайтириш, иқтисодиёт, таълим ва маданиятни ривожлантириш тўғрисида» дея, санаб ўтди у.
Россия маъмуриятининг стратегияси — аҳолининг барқарор ўсишига қайтадан киришиш ва 2030 йилда Россияда ўртача умр кўришни 78 йилга етказиш.
«Статистикалар, афсуски, нохуш рақамларни келтириб чиқармоқда ҳатто маълум даражада пасайишни кўрмоқдамиз, бу пандемия билан боғлиқ ҳолда юз бераётгани шубҳасиз, аммо биз ушбу энг муҳим соҳадаги стратегик мақсадларни бекор қилмаймиз», — деди президент.
Тадбир залида депутатлар, сенаторлар, ҳукумат аъзолари, президент маъмурияти вакиллари, ҳудудлар раҳбарлари, конституциявий ва олий судлар, рус православ черкови ва бошқалар— жами 1000 га яқин киши иштирок этмоқда. 435 нафар журналист тадбирни кузатиш учун аккредитациядан ўтган.
Аввалроқ Путиннинг мурожаати арафасида Москвадаги Манеж майдонига тўсиқлар ўрнатилгани ҳақида хабар берилганди. Москва мериясига ушбу санада Манеж майдонида Алексей Навальнийни қўллаб-қувватловчи акция ўтказиш ҳақида ариза келиб тушган. Шаҳар ҳокимияти бунга розилик бермаган.
Изоҳ (0)