АҚШнинг Аризона штатида муҳожирлар билан боғлиқ инқироз туфайли фавқулодда ҳолат эълон қилинди

Мексика билан чегарадаги инқироз шароитида АҚШ штати Аризонанинг олти округида фавқулодда ҳолат эълон қилинди. Тартибни сақлаш учун округларга Миллий гвардия аскарлари юборилди. Бу ҳақда «Коммерсантъ» хабар берди.

«Федерал ҳукумат ҳаракат қилмайдиган бўлса, Аризона ҳаракат қилади. Чегарадаги инқирозни ҳал қилиш учун мен фавқулодда ҳолат эълон қилдим ҳамда Аризона миллий гвардиясидан жасур эркаклар ва аёлларни ҳуқуқ тартибот органларининг саъй-ҳаракатларини қўллаб-қувватлаш ва Аризона аҳолисини ҳимоя қилиш учун жўнатмоқдаман»,  — деб ёзди губернатор Даг Дьюси Twitter’да.

Таъкидланишича, штат ҳокимияти чегарачилар томонидан ушлаб қолинаётган муҳожирлар сонининг кескин кўпайиши сабабли шундай қарорга келган.

«АҚШ чегара хизмати ҳолдан тойди. Маҳаллий ҳуқуқни муҳофаза қилиш идоралари ва шаҳар мерлари ёрдамга чақирмоқда», — дея қўшимча қилди губернатор. Фавқулодда ҳолат чегарадаги Кочис, Пима, Сант-Крус, Юма, Марикопа ва Пинал округларида жорий этилди.

Аризона чегара округларига Миллий гвардиянинг 250 нафар жангчисини жойлаштириш учун тахминан 25 миллион доллар ажратади. Губернатор президент Жо Байден маъмуриятини минтақадаги федерал фавқулодда режимни бекор қилиш билан муҳожирлар сонининг кескин ўсишига йўл қўйиб берганликда айблади.

АҚШ Божхона ва чегараларни муҳофаза қилиш бюросининг маълумотларига кўра, март ойида мамлакат жанубий чегарасида тахминан 172 минг ноқонуний муҳожир ушлаб қолинган, бу сўнгги 15 йил ичидаги энг юқори кўрсаткич. Агентлик чегарани кесиб ўтишга уринган қаровсиз болалар сони кўпайганини таъкидламоқда. Бу Байденнинг болалар фақат катталар ҳамроҳлигида зудлик билан Мексикага қайтарилиши мумкин деган сиёсати фонида келиб чиқмоқда.

Трамп ҳам Байденни АҚШ чегарасидаги муаммолар учун айбламоқда. Трампнинг фикрига кўра, Жо Байден маъмурияти зудлик билан Мексика чегарасидаги деворнинг қурилишини қайта бошлаши керак. Унинг айтишича, янги маъмуриятнинг хатти-ҳаракатлари одамларнинг ўлими ва фожиали воқеаларга, шунингдек, жанубий чегара орқали АҚШга гиёҳванд моддалар олиб кирилишига сабаб бўлди. Шунинг учун расмийлар зудлик билан девор қурилишини якунлаши керак. Трамп буни бир неча ҳафта ичида амалга ошириш мумкинлигини таъкидлади.