Япониянинг авария содир бўлган «Фукусима-1» атом электр станцияси (АЭС)даги таркибида радиоактив моддалар бор сувни Тинч океанига тўкиш тўғрисидаги қарори россиялик экологларни хавотирга солмоқда. Бу ҳақда «Интерфакс» хабар берди.
«Радионуклидлардан тозалаймиз деган гапларига қарамай, уларнинг АЭСдаги сувни океанга тўкиши яхши фикр эмас. Япония сувни паст концентрация (радиоактив тритий)гача суюлтиришни режалаштирмоқда, аммо бу қанча вақт олиши номаълум», — деди Бутунжаҳон ёввойи табиат фонди (WWF) денгиз дастурининг катта маслаҳатчиси Константин Згуровский.
Шу билан бирга, у Япониянинг бошқа иложи йўқлиги, чунки АЭСдаги сув омборлари тўлиб бораётгани ва тез орада реакторларни совутадиган сувни тўкиб юборишга жой қолмаслигини ҳам айтиб ўтди.
Эколог Японияга қўшни мамлакатларнинг хавотири ўринли деб ҳисоблайди, чунки сувдаги радиоактив зарралар оқим бўйлаб тарқалиши мумкин. «Бахтимизга оқим Россия томонга эмас, Тинч океанига боради. АЭСдаги авариядан кейин Калифорнияга туташ сувлар таркибида радионуклидлар кўпайгани қайд этилган. Шунинг учун ҳам қўшни давлатлар хавотирланмоқда», — дейди Згуровский
Ўз навбатида, «Гринпис» халқаро экологик ташкилотининг Россиядаги бўлими директори Иван Блоков Япония расмийларининг қарорини шарҳлар экан, «ҳар қандай ҳолатда ҳам радиоактив чиқиндиларни очиқ муҳитга ташлаш ахлоқий жиҳатдан номақбул», деди.
Унинг фикрича, АЭСдан чиқариб ташланадиган сувдаги зарарли моддаларни тўлиқ бартараф этишнинг иложи йўқ. «Бу энг яқин жойлардаги атроф-муҳитга жуда ёмон таъсир қилади», — деди эколог.
Россия Токионинг қўшни давлатлар, шу жумладан, Россия билан «Фукусима-1» АЭСдан сувни океанга тушириш режаси бўйича маслаҳатлашувлар ўтказишни зарур деб ҳисобламаганидан афсусда. Бу ҳақда аввалроқ Россия Ташқи ишлар вазирлигининг расмий вакили Мария Захарова таъкидлаб ўтган.
Эслатиб ўтамиз, Япониядаги «Фукусима-1» АЭСдаги радиоактив моддалардан тозаланган сув икки йилдан сўнг Тинч океанига қуйилишни бошлайди. «Фукусима-1»да тозаланган сув миқдори доимий равишда ортиб бормоқда. Reuters маълумотларига кўра, айни пайтда унинг ҳажми 1,25 миллион тоннани ташкил этади. АЭСда сув ядро реакторларини совитиш учун ишлатилади. Уни радиоактив элементлардан бутунлай тозалаб бўлмайди. Шунинг учун, сув қўшимча равишда тоза суюқлик билан аралаштирилади ва шундан кейингина океанга ташланади. Ҳозирда тозаланган сув «Фукусима-1» ҳудудидаги сув омборларида сақланмоқда. Тахминларга кўра, 2022 йилнинг ёзига қадар омборлар сувга лиқ тўлади.
Япония расмийларининг қарори бир қатор давлатларнинг салбий реакциясига сабаб бўлди. Хитой Ташқи ишлар вазирлиги Япониянинг сувни Тинч океанига тўкиш тўғрисидаги қарорини масъулиятсизларча ўйланган ва қўшни мамлакатларга зарар етказиши мумкин, дея танқид қилди.
АҚШ эса Япониянинг АЭСдаги сувни йўқ қилиш масаласига масъулият билан ёндашганига ва Токио ҳукуматининг мазкур масалада келгуси ҳаракатларини ҳам мувофиқлаштиришига умид қилмоқда.
Изоҳ (0)