Россияда ишлаш учун қурилиш компаниялари томонидан чет элдан махсус олиб келинган қурувчиларнинг учдан бир қисмигача бўлган қисми бошқа соҳаларга айниқса, маоши юқори бўлган курьерлик ишига ўтиб кетади. Бу ҳақда Россиянинг «Интеко» компаниялар гуруҳи раҳбари Александр Николаев «РБК»га берган интервьюсида айтиб ўтди.
Николаевнинг сўзларига кўра, бу қурилиш соҳаси учун «улкан муаммо» бўлиб қолмоқда. У курьерларнинг иш ҳақи қурувчиларнинг иш ҳақидан юқори ёки у билан солиштириш мумкин, аммо етказиб беришда ишлаш «объектив равишда осонроқ», «12 соат давомида қаттиқ ишлаш» шарт эмаслигини айтиб ўтди. Қурилиш вазирлиги ҳузуридаги жамоат кенгаши аъзоси бўлган Николаевнинг таъкидлашича, ушбу муаммо ҳам тегишли вазирлик, ҳам Ички ишлар вазирлиги ва бошқа давлат идоралари билан муҳокама қилинмоқда.
Пандемиядан олдин Москвада битта ишчи компанияга ўртача 50—60 минг рубль (658—790 доллар)га тушган бўлса, энди ишчиларнинг нархи 100—110 минг рубль (1317—1449 доллар)гача ўсди, дейди Николаев. Унинг сўзларига кўра, харажатлар иш ҳақининг ошиши ҳисобига ҳам, мамлакатга қурувчиларни олиб кириш харажатлари ҳисобига ҳам ошган. «Ишчиларни олиб келиш, жойлаштириш, овқат, сув билан таъминлаш, тиббий суғурта учун пул тўлаш, патент учун пул тўлаш керак», — деб санаб ўтди Николаев.
«hh.ru» хабарига кўра, 2020 йилда Москвада қурилиш ва пардозлаш ишлари бўйича бир мутахассиснинг ўртача иш ҳақи 64,4 минг рубль (тахминан, 843 доллар)ни ташкил этган. Ҳудудларда ўртача иш ҳақи даражаси 58,9 минг рубль (тахминан, 763 доллар) бўлган. «А101» компаниялар гуруҳининг ривожланиш департаменти директори Павел Турковнинг сўзларига кўра, қурилиш майдончасидаги даромад ойига 90 минг рублни (1185 доллар) ташкил қилиши мумкин.
Курьерларнинг иш ҳақи бўйича таклифлари 2019 йил апрелдан 2020 йил охиригача 35 дан 45 минг рублгача (ўртача 526 доллар) кўтарилган. Шу билан бирга, SuberJob маълумотларига кўра, Москвада курьерлар пиёда 80 минг рубль (1053 доллар)гача, шахсий машинаси билан эса 100 минг рублгача (1317 доллар) пул ишлаши мумкин.
Қурилиш майдонларида ишчилар етишмаслиги муаммоси долзарб бўлиб қолмоқда, дея хулоса қилади Николаев. «Қайси турдаги ишчи кучининг етишмаслиги ҳақида турли манбаларда турли хил рақамлар айтиб туради. Шунга қарамай, бу нафақат турар жой қурилишида, балки умуман қурилиш соҳасида юз минглаб одамларни ташкил қилади», — дея таъкидлайди у.
Пудратчи компаниялар ишчилар учун рақобатлашади: агар ишчиларга янада мўмайроқ даромад таклиф этилса, улар бошқа қурилиш майдончасига кўчиб ўтиши мумкин, дейди «Гранель» компаниялар гуруҳининг қурилиш бўйича директори Андрей Зимонов. Аммо Зимоновнинг сўзларига кўра, «Гранель»нинг пудратчилари олиб келган қурувчиларда касбини ўзгартириш ҳолати юз бермаган.
Москвадаги қурилиш майдонларида МДҲ мамлакатларидан қурилиш мутахассисликлари бўйича ишчиларни жалб қилиш муаммоси сақланиб қолмоқда, дейди Турков. Аммо Турков бунинг сабабини МДҲ давлатлари қурувчиларининг Ўзбекистон, Қозоғистон, Озарбайжон ва бошқа мамлакатларда йирик ва фаол ривожланаётган қурилиш лойиҳалари кўринишидаги альтернативга эга бўлишида кўради.
«Коронавирус таҳдиди ҳанузгача сақланиб қолмоқда, кўпчилик ишчилар буни Москвадаги қурилиш лойиҳаларини тўхтатувчи хавф деб билади ва мазкур шароитда улар иқлим ва руҳий жиҳатдан яқинроқ муҳитда, вирус чекловлари унчалик қаттиқ бўлмаган мамлакатларда ишлашни танлайди», — деди Торков.
«РБК» хабар беришича, Қурилиш вазирлиги январь ойида уй-жой ва инфратузилма объектларини қуриш учун Россияга хорижий фуқароларни олиб кириш механизмини ишга туширган. Қурувчилар асосан Ўзбекистон, Тожикистон ва Қозоғистондан келади. Бош вазир ўринбосари Марат Ҳуснуллин меҳнат муҳожирларининг чиқиб кетиши Россияда 2020 йилда уй-жой нархлари кўтарилишининг асосий сабабларидан бири бўлганини бир неча бор таъкидлаган. Апрель ойида президент Владимир Путин Федерал Монополияга қарши курашиш хизматига Россияда уй-жой нархларининг кўтарилишини текширишни буюрди: ўтган йил давомида квартиралар нархи ўртача 12 фоизга ўсган, айрим ҳудудларда ўсиш 20—30 фоизга етган.
Изоҳ (0)