НАТО 1 майдан бошлаб Афғонистондан ўз қўшинларини олиб чиқишни бошлайди. Бу ҳақда Шимолий Атлантика альянсининг баёнотига таяниб, «РБК» хабар берди.

Фото: Getty Images

«Иттифоқчилар қарорига кўра, биз 1 майга қадар «Қатъий қўллаб-қувватлаш» миссиясида иштирок этаётган ҳарбий кучларни олиб чиқишни бошлаймиз», — дейилади иттифоқ баёнотида.

НАТО олиб чиқиш пайтида толибонлар томонидан уюштирилиши мумкин бўлган ҳар қандай ҳужум «ҳал қилувчи жавоб» олишидан огоҳлантирмоқда. «Қўшинларимизни олиб кетиш бизнинг Афғонистон билан муносабатларимиз тугаганини англатмайди», — дея қўшимча қилди Шимолий Атлантика альянси.

АҚШ президенти Жо Байден америкалик ҳарбийлар Афғонистонни 11 сентябрга қадар тарк этишини маълум қилганди. Байденнинг айтишича, Америка қўшинлари Афғонистонга бу мамлакатни бирлаштириш мақсадида жойлаштирилмаган, улар ўзларига юклатилган вазифаларини якунлаган.

«Биз Афғонистонга иккита сабаб билан қўшин юборганмиз: «Ал-Қоида» террористик ташкилоти фаолиятини тугатиш, шунингдек, Афғонистонни террорчиларга бошпана бўлишига ортиқ йўл қўймаслик. Менда аввал бошиданоқ Афғонистонни қандайдир тарзда бирлаштириш учун қўшин юбордик, деган фикр бўлмаган» — деди у. Президентнинг сўзларига кўра, АҚШ ўз мақсадларига эришган.

Болгария ҳам АҚШ маъмурияти ва НАТО иттифоқчилари ортидан Афғонистондаги ҳарбий контингентини олиб кетишга қарор қилди.

«Бугун биз мазкур масаладаги дастлабки мунозарани ўтказдик, яқин келажакда эса ҳукуматнинг навбатдан ташқари йиғилишини ўтказамиз ва ўз қўшинларимизни Афғонистондан олиб чиқиб кетамиз», — деди бош вазир Бойко Борисов.

Ҳозирда Афғонистонда 120 нафар болгариялик ҳарбий хизматчи бор, улар хавфсизлик ширкати ва Кобулдаги миссия штаб-квартирасида ҳарбий базалари атрофини, хусусан, «Багром» аэродромини ва штабнинг ўзини ҳимоя қилиш вазифаларни бажаради.

Ўз навбатида Грузия ҳам Афғонистондан ҳарбий кучларини олиб кетиши ҳақида эълон қилди.

Грузия бош вазири Иракли Гарибашвилининг таъкидлашича, Грузия раҳбарияти АҚШ ва бошқа шериклар билан келишган ҳолда, НАТОнинг «Қатъий қўллаб-қувватлаш» тинчликпарварлик миссияси иштирокчилари бўлган бошқа давлатлар билан параллел равишда Афғонистондан қўшинларини олиб чиқишга қарор қилди.

Бош вазирнинг сўзларига кўра, Грузия ҳарбий хизматчилари «АҚШ билан яқин ҳамкорликда» Афғонистонни сентябргача тарк этади.

Иракли Гарибашвили Грузия 2004 йилдан бери «НАТОнинг Афғонистондаги миссиясига энг катта ҳисса қўшганлардан бири» бўлганини, у ерда бугунги кунда 860 нафар грузин аскари хизмат қилаётганини таъкидлади. «Улар мамлакатимизнинг халқаро хавфсизлик учун жамоавий жавобгарлик юкини муносиб кўтара олишини исботлади», деди бош вазир. Унга кўра, Грузиянинг НАТО миссиясидаги муваффақиятли иштироки унинг стратегик мақсади — Шимолий Атлантика альянсига аъзо бўлиш учун муҳим омил бўлади».

Кейинчалик Грузия ташқи ишлар вазири Давид Залкалиани Грузия ҳарбийларини олиб чиқиш тўғрисидаги қарор тафсилотларини ошкор қилди: «Мен Грузия ҳарбий хизматига миссияда қатнашгани учун шахсан қўнғироқ қилиш ва миннатдорлик билдиришни лозим топган АҚШ давлат котиби Энтони Блинкендан миннатдорман», — деди Грузия дипломатик департаменти раҳбари.

14 апрель куни Грузия президенти Саломе Зурабишвили махсус баёнот берди. «Грузия армияси НАТО миссиясида жамоавий мудофаа ва хавфсизлик вазифаларини муносиб бажаришга қодирлигини исботлади», деди давлат раҳбари.

АҚШ ва НАТОнинг Афғонистондаги ҳарбий операциялари давомида 2004 йилдан буён 32 нафар Грузия ҳарбий хизматчиси ҳалок бўлган ва юзга яқин киши жароҳат олган.