Россия президенти Владимир Путин ва АҚШ президенти Жо Байден ўртасидаги учрашув ёз фаслида бўлиб ўтиши мумкин. Бу ҳақда Оқ уй матбуот котиби Жен Псакига таяниб, «РБК» хабар берди.
Псакининг сўзларига кўра, учрашувнинг яқин ойларда ташкил этилиши кутилмоқда. «Яқинлашаётган ёз ойларида бўлиши мумкин», — деб аниқлик киритди АҚШ президентининг расмий вакили.
Аввалроқ Байден ва Путин телефон орқали мулоқот қилган эди, унда АҚШ президенти икки давлат ўртасидаги муносабатларнинг барча масалаларини муҳокама қилиш учун Россия етакчисига энг яқин ойларда «учинчи мамлакат»да учрашишни таклиф қилди. Кремль эса Путинга учрашув таклифи келганини тасдиқлади.
Австрия ташқи ишлар вазири Россия ва АҚШ президентларининг учрашувини ўтказиш масаласига муносабат билдирар экан, Австрия ҳар доим юқори даражадаги музокаралар майдони бўлишга тайёрлигини маълум қилди.
«Агар Россия ва АҚШ президентлар ўртасида саммит ўтказишга қарор қилса, бу эътирофга лойиқ. Бундай саммитнинг қачон ва қаерда ўтказилиши тўғрисидаги қарорнинг қабул қилиниши ҳар икки давлатнинг ўзига боғлиқ», — деб таъкидлади вазирлик ва Австриянинг «ҳар қандай юқори даражадаги музокаралар учун» доим тайёр эканини қўшимча қилди.
Маълумот учун, Россиянинг АҚШдаги элчиси Анатолий Антонов Москвага маслаҳатлашиш учун чақириб олинганидан кейин учрашув таклифи берилди. Расмийлар Байденнинг ABC News телеканалига берган интервьюсидан сўнг шундай қарорга келди. Интервьюда Байден «Путинни қотил деб ҳисоблайсизми?» деган саволга тасдиқ жавобини берган. Путин бунга жавобан Байденга мустаҳкам соғлик тилаган ва болалар учун айтиладиган ҳазилни ҳам эслаб, «Ким кимнидир ёмонласа, ўша фикрга аслида ўзи муносиб» мазмунидаги жумлани мисол қилиб келтирган.
Оқ уй матбуот хизматига кўра, телефондаги мулоқотда Байден «АҚШ ўзининг миллий манфаатларини ҳимоя қилишда, шу жумладан, хакерлик ҳужумлари ва сайловларга аралашишга қатъий қарши туришини таъкидлади», шунингдек, у Путинга АҚШнинг Украина ҳудудий яхлитлигини қўллаб-қувватлашини айтди.
Кремль маълумотларига кўра, давлат раҳбарлари Украинадаги ҳолат бўйича ўзаро фикр алмашди. Путин Минск шартномалари асосида сиёсий келишувга нисбатан ўз ёндашувларни баён қилди. Бундан ташқари, раҳбарлар қурол назорати, Афғонистондаги вазият, Эрон ядро дастури ва глобал иқлим ўзгаришини муҳокама қилди.
Изоҳ (0)