АҚШ эмланганларда тромбоз аниқлангандан кейин Johnson & Johnson вакцинасидан фойдаланишни тўхтатди. Европа ва Жанубий Африкада вакцинани қўллашни бошлаш кейинга қолдирилди

АҚШ озиқ-овқат ва фармацевтика бўлими (FDA) ҳамда Касалликларни назорат қилиш ва олдини олиш маркази (CDC) Johnson & Johnson компаниясининг коронавирусга қарши вакцинасидан фойдаланишни тўхтатишни тавсия қилди, деб ёзади Meduza.

Кузатув регуляторларининг қўшма баёнотига кўра, ушбу препарат билан эмланганларнинг олти нафарида вакцинациядан кейин тромблар ҳосил бўлгани аниқлангач, шундай қарор қабул қилинди. Тромблар 18 ёшдан 48 ёшгача бўлган аёлларда пайдо бўлган ва унинг белгилари 6-13 кундан кейин юзага чиққан. Аёллардан бири вафот этган, яна бири оғир аҳволда шифохонага ётқизилган.

Johnson & Johnson вакцинаси билан эмланган беморларда қон тромблари ҳосил бўлиш ҳолати жуда кам учрайди, дейилади баёнотда. Шу билан бирга, регуляторлар текширув тугамагунча вакцинадан фойдаланмаслик керак, деган фикрда.

АҚШда Johnson & Johnson билан эмланган бир нечта кишида қон тромблари ҳосил бўлгани ҳақидаги хабарлардан сўнг, Европада мазкур вакцинадан фойдаланиш кечиктирилди. Бу ҳақда компания веб-сайтида хабар берилган.

«Маҳсулотимиздан фойдаланадиган одамлар хавфсизлиги ва фаровонлиги бизнинг устувор вазифамиздир. Бизнинг COVID-19 вакцинамизни қабул қилганларнинг жуда озчилигида тромбоцитлар миқдори камлиги билан боғлиқ жуда кам учрайдиган тромбоз ҳосил бўлганидан хабардормиз. АҚШ Касалликларни назорат қилиш маркази (CDC) ва Озиқ-овқат ва фармацевтика бўлими (FDA) АҚШда 6,8 миллиондан ортиқ дозада қабул қилинган вакцинадан юзага келган олтита асоратни кўриб чиқмоқда», — дейилади компания хабарида.

«Бундан ташқари, биз ушбу ҳолатларни Европа соғлиқни сақлаш органлари иштирокида ҳам кўриб чиқмоқдамиз. Шу сабабли биз Европада ўз вакцинамизни жорий этишни кейинроққа қолдиришга қарор қилдик», — дея компанияда «ушбу маълумотни тиббиёт мутахассислари ва жамоатчилик ўртасида очиқ тарқатилишини» қатъий қўллаб-қувватлашларини қўшимча қилди.

Жанубий Африкада ҳам Johnson & Johnson вакцинасидан фойдаланиш вақтинча тўхтатилди. Вакцинани рад этиш Африканинг коронавирусдан энг кўп азият чеккан ушбу мамлакатида эмлаш кампаниясини кечиктиради.

«Биз қонда тромблар ҳосил бўлиши ва Johnson & Johnson вакцинаси ўртасидаги сабабий боғлиқлик обдон ўрганилгунга қадар ундан фойдаланишни тўхтатиб туришга қарор қилдик»,  — деди Жанубий Африка соғлиқни сақлаш вазири Звели Мхизе.

Жанубий Африка регулятори икки ҳафта олдин Johnson & Johnson вакцинасини маъқуллаган эди, аммо ҳозирга қадар препарат фақат тадқиқот доирасида тиббиёт ходимларига татбиқ этилиб келинаётган эди.

Маълумот учун Johnson & Johnson компаниясининг вакцинасидан фойдаланиш АҚШда февраль ойида, Европа Иттифоқида эса март ойида тасдиқланган. 12 апрель ҳолатига кўра, Johnson & Johnson АҚШга 6,8 миллион дозадаги вакцинани етказиб берган.

Johnson & Johnson вакцинаси ҳозирги кунда бутун дунёда қўлланилаётган бошқа кўплаб вакциналардан фақрли равишда иккита эмас, битта дозада юборилади. Россиянинг «Спутник Лайт» вакцинаси сингари аденовируснинг 26-серотипи асосида ишлаб чиқарилган мазкур вакцина ҳали  кенг қўлланилишни бошламаган. «Спутник Лайт» Россияда энг кўп ишлатиладиган икки компонентли «Спутник V» вакцинасининг биринчи компонентидир.