Владимир Путин коронавирусга қарши вакцинанинг иккинчи дозасини олди

Россия президенти Владимир Путин 14 апрель куни коронавирусга қарши вакцинанинг иккинчи дозасини қабул қилди. Бу ҳақда у Россия географик жамиятининг Васийлик кенгаши йиғилишида маълум қилди, деб ёзади Meduza.

«Сизга шуни маълум қиламанки, ҳозиргина, ушбу хонага киришдан олдин мен ҳам вакцинанинг иккинчи дозасини олдим. Умид қиламанки, ҳаммаси яхши бўлади. Йўқ, умид эмас, бунга аминман», — деди Путин.

Президент йиғилишдаги «ўзи ва яқинларига ғамхўрлик қиладиган» иштирокчиларнинг ҳам вакцина олишига умид билдирди.

23 март куни Путин коронавирусга қарши вакцинанинг биринчи дозаси билан эмланган эди.  Путин омма олдида эмланишдан бош тортган. Песков президент «камералар нишони остида» вакцина олишни ёқтирмаслигини айтганди. Президент матбуот котиби Путин «вакциналар тарғиботи учун шундоқ ҳам кўп нарса қилаётгани»ни таъкидлаган.

Нега у бошқа давлатларнинг етакчилари сингари журналистлар олдида эмланмагани ҳақидаги саволга Путиннинг ўзи шундай жавоб берди: «Хўш, биз ҳам маймун ўйнатишимиз керакми нима? Қаердадир кимларнидир қилган ишини таркрорлашимиз керакми? Менимча, йўқ. Ахир, бундай даражада кимдир бирор нарсани сохталаштирмоқчи бўлса, кимнидир алдашни хоҳласа, буни қилиш қийин эмас».

Путин қайси вакцина билан эмлангани номаълум. Кремль бу маълумотни ошкор қилишдан бош тортди. Кремль Владимир Путиннинг вакцина олиш тўғрисидаги қароридан кейин мамлакатда коронавирусга қарши эмлаш суръатининг ошишига умид қилмоқда.

Аввал март бошида давлат раҳбарларидан Украина президенти Владимир Зеленский коронавирусга қарши эмлангани, Ҳиндистон бош вазири Нарендра Моди коронавирусга қарши мамлакатда ишлаб чиқарилган COVAXIN вакцинасининг биринчи дозасини олгани, шунингдек, дунёнинг энг бадавлат кишиларидан бири, Berkshire Hathaway бош директори Уоррен Баффет Pfizer/BioNTech компаниясининг вакцинаси билан коронавирусга қарши эмлангани ҳақида хабарлар берилган.

Февраль ойида Туркия президенти Ражаб Тоййиб Эрдўғон унга коронавирусга қарши вакцинанинг иккинчи дозаси юборилганини маълум қилган, у вакцинанинг биринчи дозасини 14 январда қабул қилиб олганди.

Бундан аввал Шаҳзода Чарльз ва унинг рафиқаси, БМТ бош котиби, миллиардер Билл Гейтс, Аргентина президенти ҳамда Жанубий Корея президенти ва унинг рафиқаси коронавирус вакцинаси билан эмланган.