Туркияда COVID-19’га чалиниш ҳолатлари сони бўйича янги рекорд ўрнатилди. Бу ҳақда мамлакат Соғлиқни сақлаш вазирлигининг маълумотларига таяниб Ўзбекистоннинг Истанбулдаги Бош консулхонаси хабар берди.
Хабарга кўра, ўтган бир кеча-кундузда Туркияда 59187 кишида коронавирус инфекцияси қайд этилди, 52104 киши касалликдан тузалди, 273 киши вафот этди. Пандемия бошидан буён касалланганларнинг умумий сони 3,96 миллион кишини ташкил этди, инфекция оқибатидаги ўлимлар — 34 455, соғайганлар — 3,4 миллион.
Туркияда март ойининг охирида коронавирус қайта авж ола бошлади. Шундан сўнг мамлакат президенти Тоййиб Ражаб Эрдўғон 58 та шаҳарни COVID-19 юқтириш хавфи юқори бўлган қизил ҳудуд, дея эълон қилди. Мазкур шаҳарларда Туркия аҳолисининг 80 фоизи истиқомат қилади.
Шунингдек, Эрдўғон Туркия ҳукумати Рамазон ойининг дастлабки икки ҳафтасида коронавирусга қарши чеклов чораларини кучайтиришини маълум қилди.
Мамлакатда 14 апрель, чоршанба кунидан бошлаб комендантлик соати давомийлиги узайтирилиб, у иш кунлари соат 19:00 дан (илгари 21:00 дан эди) эрталаб соат 05:00 гача амал қиладиган бўлди, бу вақтда кўчага чиқиш тақиқланади. Аввалроқ, расмийлар 12 апрелдан бошлаб дам олиш кунлари учун тўлиқ комендантлик соати киритган эди, ушбу чора ўз кучида қолади.
Ресторан ва кафелар фақат етказиб бериш ва олиб кетиш режимида ишлайди, спорт заллари Рамазон ойининг охиригача ёпиқ бўлади. Шунингдек, расмийлар шаҳарлараро транспортни тақиқлашни жорий қилди, бу истисно ҳолатларга таъсир қилмайди.
Бундан ташқари, Туркияда жамоат транспорти учун чекловлар кучга киради ва барча ёпиқ бинода ўтказиладиган машғулотлар тақиқланади. Айрим ўқувчи ва талабалар масофавий таълимга қайтади.
Туркия соғлиқни сақлаш вазири Фахриддин Кожа мамлакат коронавирус пандемиясининг энг қийин даврлардан бирини бошдан кечираётганини айтганди. Вазир мамлакатнинг барча ҳудудларида касалланиш ўсиб бораётганини таъкидлади. Фахриддин Кожа Туркиядаги COVID-19 билан боғлиқ вазиятни баҳолаш учун мамлакатга Россия делегациясининг ташриф буюришини маълум қилди.
Аввалроқ Россия 15 апрелдан 1 июнгача Туркияга доимий ва чартер рейсларни тўхтатиши ҳақида эълон қилганди. Шунингдек, Россия билан бир қаторда Хитой ва бошқа мамлакатлар ҳам Туркия билан парвозларни тўхтатишга қарор қилди. Хитойнинг фуқаро авиацияси маъмурияти (CААC) турк авиакомпанияларига 19 апрелдан бошлаб тўрт ҳафта давомида парвозларни тўхтатишга буйруқ берилганини эълон қилди.
Ўзбекистон Туркия билан парвозларни ҳали тўхтатмаган. Март ойининг охирида Самарқанд—Истанбул—Самарқанд йўналиши бўйича мунтазам рейслар тикланган эди.
Изоҳ (0)