Бирлашган Араб Амирликлари (БАА) қирғоқларида Исроилга тегишли юк кемасига ҳужум уюштирилди. Hyperion Ray кемасига қилинган ҳужум Фужайра амирлиги яқинида содир бўлди, деб ёзади Meduza.
Исроилнинг энг машҳур «12» телеканали юк кемаси узоқ масофадан ракета билан урилганини ва кеманинг ўзи зарар кўрмаганини даъво қилмоқда. Reuters манбаларига асосланиб ёзишича, кемада портлаш содир бўлган, аммо қурбонлар йўқ.
Times of Israel газетасининг хабар беришича, Қуддусдаги расмийлар ҳужумга Натанз шаҳридаги уранни бойитиш заводидаги портлаш туфайли Исроилдан қасос олишга ваъда берган Эроннинг алоқаси бор, деб ҳисобламоқда.
БААнинг араб тилида юритилувчи Аl-Arabia телеканали манбаларига таяниб, «Исроилга тегишли юк кемаси Эрон ракетаси билан урилганидан кейин» Исроил ҳарбий денгиз кучлари юқори тайёргарлик ҳолатга келтирилганини айтди.
Исроил, Эрон ва БАА расмийлари бу борада изоҳ бермади.
Юк кемасига ҳужум уюштирилишидан аввал 11 апрелда Эроннинг Натанз шаҳридаги Аҳмад Рошан номли уранни бойитиш комплексида электр таъминотини тақсимлаш тизимида муаммолар кузатилган. Али Акбар Солиҳий тизимдаги носозлик «ядро террорчилиги» ҳаракати туфайли юзага келганини билдирган. Аммо у мазкур ҳаракатлар ортида қайси кучлар турганлиги борасида муайян фикр билдирмасликка қарор қилган.
12 апрель куни Эрон ташқи ишлари вазири Жавод Зариф Исроилнинг Натанздаги ядро объектига уюштирилган ҳужум учун масъулиятни ўз зиммасига олганини маълум қилди ва Теҳрон бу ҳаракат учун жавоб қайтаришини билдирди. Кейинчалик Зариф ҳали содир бўлган ҳодиса учун якуний хулосалар олинмаганини айтиб, қайта огоҳлантириш берган.
Эрон ОАВ мамлакат разведка вазирлигидаги манбаларга таяниб, Теҳроннинг Натанздаги объектга уюштирилган ҳужум ортида турган шахснинг кимлиги аниқлангани ва айни вақтда уни қўлга тушириш борасидаги чора-тадбирлар амалга оширилаётганини хабар қилган.
Изоҳ (0)