Биткоин нархи биринчи марта 64 минг доллардан ошиб, тарихий рекордни янгилади

Биткоин нархи криптовалюта тарихида биринчи марта 64 минг доллардан ошди. Бу ҳақда CoinDesk порталининг маълумотларида келтириб ўтилди.

Тошкент вақти билан соат 10:14 да биткоин 64,33 минг доллардан сотила бошлади. Сўнгги бир кеча-кундузда биткоин 6,28 фоизга қимматлашди. Криптовалютанинг бозор капиталлашуви 1,2 триллион долларга етди, кунлик савдо ҳажми 73,97 миллиард долларни ташкил қилди.

CoinDesk таҳлилчиси Даманик Дантес илгари изоҳлаб берганидек, биринчи криптовалюта уч ой давом этган консолидация босқичини якунлади. Унинг фикрига кўра, ўсиш тенденцияси давом этади ва кейинги барқарорлик даражаси 68-70 минг долларни ташкил этади.

13 март кунги савдолар чоғида биткоин нархи биринчи марта 60 минг доллардан ошган эди. 2 январь куни биткоин курси 32 минг долларлик чегарадан ўтиб, савдо сессияси давомида биткоин қиймати 32 700 долларни ташкил этган. Декабрь ўрталарида биткоин нархи 5 минг долларга ошган эди. 16 декабрь куни криптовалюта қиймати биринчи бор бир суткада 12 фоизга қимматлашиб, 20 минглик чегарадан ўтиб кетган. 21 декабрь куни биткоин курси 24 минг доллардан ошган, кейинги бир неча кун давомида эса 24,6 минг долларлик оралиқда сақланган. 26 декабрь куни эса биткоин нархи биринчи бор 25 минг доллардан ошиб кетганди.

Эслатиб ўтамиз, биткоин 2017 йилда криптовалюталарга қизиқишнинг ошиши фонида бир йилда 20 баравар қимматлади, шундан кейин унинг курси тезлик билан пасайишни бошлаган. 2018 йилнинг июнь ойида биткоин нархи 6 минг доллардан қимматроқ бўлган, 2019 йилнинг бошида эса унинг нархи 3,5 минг долларгача пасайган. Шундан сўнг биткоин нархи яна ошишни бошлаган.