Ўзбекистон Адлия вазирлиги 12 апрель куни бош штаб-квартираси АҚШда жойлашган Халқаро тадқиқотлар ва алмашинувлар кенгашининг (IREX) филиалини рўйхатдан ўтказди. Бу ҳақда «Gazeta.uz» хабар қилди.
«Филиалнинг асосий мақсад ва вазифалари — бу Ўзбекистонда фаровон ва тенг ҳуқуқли жамият қурилишига ҳисса қўшиш, Ўзбекистон ёшларининг имкониятларини кенгайтириш ва бўлажак раҳбарларни тарбиялашга, сифатли таълим ва ахборот олиш имкониятларини кенгайтиришга кўмаклашиш ҳамда Ўзбекистонга инглиз тили соҳибларини жалб қилган ҳолда ўқитувчилар малакасини оширишга, шу билан бирга, талабаларнинг инглиз тилини интенсив равишда ўрганишини таъминлашга кўмаклашиш», — дейилади Адлия вазирлиги матбуот хизмати хабарида.
Филиал ўз мақсад ва вазифаларини Халқ таълими, Инновацион ривожланиш, Олий ва ўрта махсус таълим вазирликлари ва Ўзбекистон ёшлар ишлари агентлиги билан ҳамкорликда амалга оширади, деб таъкидлайди Адлия вазирлиги.
Ушбу ташкилот илгари Ўзбекистонда бўлган. 2006 йилда суд қарори билан унинг вакили «қонун ҳужжатлари ва миллий қонунчиликни бузганлиги» учун ёпилган. IREX билан биргаликда Америка адвокатлар ассоциацияси, Internews Network, Freedom House, ACCELS, Counterpart International, Central Asia Free Exchange Forum (CAFE), Таълим орқали глобал иштирок, Урбан институти, Евросиё жамғармаси, Академик таълим бўйича шериклик (ПАД) ва Crosslink Development International ва Winrock International ташкилотлари ҳам ёпилган.
Изоҳ (0)