Ўзбекистоннинг соф халқаро олтин-валюта захиралари ой давомида 589,1 миллион долларга камайиб, 32,6 миллиард долларни ташкил этди, дея хабар бермоқда Марказий банкка таяниб «Gazeta.uz».
Жумладан, Ўзбекистон соф халқаро захиралари 2021 йил бошига нисбатан 2,2 миллиард долларга ёки 6,5 фоизга камайди. Соф олтин-валюта захиралари (ялпи захиралар ва эркин конвертация қилинадиган валютадаги мажбуриятлар ўртасидаги фарқ) 771,8 миллион долларга қисқариб, 31,6 миллиард долларга етди.
Мамлакатнинг олтин-валюта захиралари кетма-кет уч ойдан бери қисқармоқда. Март ойида захирадаги олтин 0,2 миллион троя унциясига (6,2 тоннага яқин) кўпайиб, жами 11,4 миллион унцияга (323 тоннага яқин) етди. Бироқ ушбу захиралар қиймати март ойидаги арзонлашувдан кейин 450,9 миллион долларга камайди.
Жумладан, 1 мартда олтин нархи унцияси учун 1738,8 долларни ташкил этган бўлса, 30 март куни у 1687,8 долларгача пасайди, 1 апрель куни эса 1729,3 долларга етди. АҚШнинг 10 йиллик ғазначилик облигациялари (US Treasuries) даромадлилигининг ошиши ҳам олтин нархига салбий таъсир кўрсатади.
Ўзбекистоннинг хорижий валютадаги захиралари ҳам 132,4 миллиард долларга камайди.
Бундан аввал Навоийда 130 тонна захирали янги олтин кони топилгани, Марказий банк Ўзбекистон сўнгги 10 йилда экспорт қилган олтин ҳажмига оид маълумотларни эълон қилгани ҳамда Ўзбекистонда кредит ва хорижий валютага бўлган талаб деярли бутунлай тиклангани ҳақида хабар берилганди.
Изоҳ (0)