Коронавирусга қарши курашиш штаби аъзоси Севара Убайдуллаева фуқаролар рўзадор бўлган ҳолатда эмланиши мумкинми, деган саволга жавоб берди, дея хабар қилмоқда Соғлиқни сақлаш вазирлиги матбуот хизмати.
— Рўзадор одамда қисман жисмоний толиқиш бўлади. Шундай ҳолатда ҳам вакцина қабул қилиш керакми?
— Рўза тутишда белгиланган талаб ва амалларни ўрганиб чиқсак, имкон қадар бемор одамлар ўз саломатликларини оғирлаштирмасликлари учун айрим касалликларда рўза тутмасликлари тавсия этилади.
Бундай ҳолатларда эмлаш жараёнига таклиф этилган бўлсангиз ва шифокор кўригида касалликнинг ўткир ҳолати ёки авж олган даври кечаётгани аён бўлса, бу фуқаролар эмланмайдилар.
Саломатлик кўрсаткичлари меъёрида бўлиб, ўзини соғлом деб ҳис қилган фуқаро рўзадор бўлиб, эмлашга таклиф этилган бўлсалар, шифокор уларнинг ҳолатларини ўрганиб чиқиб, хулоса қилади.
Бунда фуқаро саломатлиги соғлом деб баҳоланиб, эмлаш тавсия этилган бўлса, унда эмлашдан кейинги даврда шифокор билан боғланиб туришлари керак. Сабаби – турли инсонлар организмининг вакцинага реакцияси турли хил бўлади. Шу боис эмланганлар шифокор тавсияларини бажаришлари талаб этилади.
Таъкидлаш керакки, инсонлар рўзаларини бузмай туриб ҳам, эмланиш орқали организмда коронавирус инфекциясига қарши иммунитет ҳосил қилишлари мумкин, – дейди Севара Убайдуллаева.
Маълумот учун, Ўзбекистон мусулмонлари идораси Фатво ҳайъати дунё уламолари хулосасига асосланиб, коронавирусга қарши эмлаш тери ости ва мушакка қилинадиган уколлардан бири бўлганлиги, бунинг устига, озиқлантирувчи эмаслигини инобатга олган ҳолда вакцина олиш жоиз экани, бу иш рўзани бузмаслиги бўйича баёнот берган эди.
Эслатиб ўтамиз, аҳолини коронавирусга қарши эмлаш тадбирлари 1 апрелдан бошланди. Эмлаш дастлаб қариялар, соғлиқни сақлаш ходимлари, ОАВ вакилларида кўнгилли тарзда ўтказилади. 9 апрель ҳолатига кўра, мамлакат бўйлаб 18 224 киши коронавирусга қарши эмланган эди.
Улар AstraZeneca ва Ўзбекистон—Хитой ҳамкорлигида ишлаб чиқилган ZF-UZ-VAC 2001 вакцинаси билан эмланмоқда. Бунда эмланувчи биринчи эмланишни қайси вакцина билан бошласа, иккинчисини ҳам айнан ўша вакцина билан якунлайди.
Изоҳ (0)