Россиянинг коронавирусга қарши кураш бўйича тезкор штаби Туркия ва Танзанияга авиақатновларни тўхтатди. Бу ҳақда мамлакат бош вазири ўринбосари Татьяна Голиковага таяниб TJournal хабар берди.
Ушбу мамлакатларда вазият барқарорлашса, авиақатновлар қайта тикланади.
15 апрелдан 1 июнгача давом этадиган тақиқ чартер ва доимий рейсларга тегишли. Истисно тариқасида ҳафтасига иккита рейсга рухсат берилади.
«Роспотребнадзор»да таъкидланишича, Россия билан авиақатновлари очиқ бўлган мамлакатлар орасида Туркия касалланиш даражаси бўйича энг юқори кўрсаткичга эга ва у ердан қайтаётган россияликлар «турли хил мутацияланган штаммлар» олиб келмоқда.
«ТАСС»нинг хабар беришича, 500 мингдан ортиқ россиялик 15 апрелдан 31 майгача бўлган давр учун Туркияга саёҳат чипталарини олдиндан банд қилиб қўйган.
Аввалроқ «Роспотребнадзор» раҳбари Анна Попова сўнгги пайтларда Туркияда коронавируснинг кескин кўпайгани ҳақида огоҳлантирган эди. Унинг сўзларига кўра, бир неча ҳафта ичида мамлакатдаги касалланиш даражаси 3,5—4 баравар ошган.
Жонс Ҳопкинс университети маълумотларига кўра, пандемия бошидан буён Туркияда 3,89 миллион киши коронавирус билан касалланди. 9 апрель ҳолатига кўра, коронавирусга чалиниш бўйича 55 791 та янги ҳолат қайд этилди.
1 август куни Туркия ва Танзания чегараларнинг тўрт ойлик ёпиқлигидан сўнг Россия билан доимий рейсларни тиклаган биринчи давлатлардан бўлди.
Изоҳ (0)