Rossiyaning koronavirusga qarshi kurash bo‘yicha tezkor shtabi Turkiya va Tanzaniyaga aviaqatnovlarni to‘xtatdi. Bu haqda mamlakat bosh vaziri o‘rinbosari Tatyana Golikovaga tayanib TJournal xabar berdi.
Ushbu mamlakatlarda vaziyat barqarorlashsa, aviaqatnovlar qayta tiklanadi.
15-apreldan 1-iyungacha davom etadigan taqiq charter va doimiy reyslarga tegishli. Istisno tariqasida haftasiga ikkita reysga ruxsat beriladi.
“Rospotrebnadzor”da ta’kidlanishicha, Rossiya bilan aviaqatnovlari ochiq bo‘lgan mamlakatlar orasida Turkiya kasallanish darajasi bo‘yicha eng yuqori ko‘rsatkichga ega va u yerdan qaytayotgan rossiyaliklar “turli xil mutatsiyalangan shtammlar” olib kelmoqda.
“TASS”ning xabar berishicha, 500 mingdan ortiq rossiyalik 15-apreldan 31-maygacha bo‘lgan davr uchun Turkiyaga sayohat chiptalarini oldindan band qilib qo‘ygan.
Avvalroq “Rospotrebnadzor” rahbari Anna Popova so‘nggi paytlarda Turkiyada koronavirusning keskin ko‘paygani haqida ogohlantirgan edi. Uning so‘zlariga ko‘ra, bir necha hafta ichida mamlakatdagi kasallanish darajasi 3,5—4 baravar oshgan.
Jons Hopkins universiteti ma’lumotlariga ko‘ra, pandemiya boshidan buyon Turkiyada 3,89 million kishi koronavirus bilan kasallandi. 9-aprel holatiga ko‘ra, koronavirusga chalinish bo‘yicha 55 791 ta yangi holat qayd etildi.
1-avgust kuni Turkiya va Tanzaniya chegaralarning to‘rt oylik yopiqligidan so‘ng Rossiya bilan doimiy reyslarni tiklagan birinchi davlatlardan bo‘ldi.
Izoh (0)