Саудия Арабистонида 11 апрель, якшанба куни ҳеч ким янги Ой чиқишига гувоҳ бўлмади, шу сабабли мамлакат Олий суди қарорига кўра, Форс кўрфази мамлакатларида мусулмонларнинг муқаддас Рамазон ойи душанба куни бошланмайди. Бу ҳақда SPА агентлигида келтирилган суднинг баёнотига таяниб, Tengrinews хабар берди.
«Янги ҳилолнинг пайдо бўлишини кўришнинг иложи бўлмади. Шу сабабли суд эртага тунда йиғилиб, Рамазон ойининг бошланиши тўғрисида қарор қабул қилади», — дейилади хабарда. Бошқа кўплаб араб давлатлари гарчи ўз астроном ва илоҳиётчиларининг кўрсатмаларига таяниб иш туца ҳам, бу масалада Саудия Арабистонига эргашади.
Қатарнинг Вақф ва ислом ишлари вазирлиги баёнотида таъкидланишича, «Шаъбон ойининг 29-куни (якшанба), янги Ойнинг осмонда пайдо бўлишини кузатиш тўғрисидаги қўмитанинг чақириғига ҳеч ким жавоб бермади, шунинг учун қўмита ўз ишини душанба куни давом эттиради ва ўша куни ўз фикрини айтади».
Хабарга кўра, Миср, Ироқ, Тунис, Ливан, Кувайт, Яман, Уммон, Бирлашган Араб Амирликларида ҳам душанба куни рўза ойи бошланмайди.
Агар янги Ойнинг чиқиши душанба куни ҳам кузатилмаса, кўплаб араб мамлакатларида Рамазон сешанба куни — 30 кунлик шаъбон ойи тугаганидан кейин бошланиши мумкин. Шунингдек, баъзи мамлакатларда, хусусан, Саудия Арабистонида чангли об-ҳаво туфайли ўтган янги Ойни кўришнинг иложи бўлмагани туфайли шаъбон ойининг бошланган санаси ҳақида шубҳалар мавжуд, шунинг учун Рамазон чоршанба куни келиши ҳам мумкин.
2021 йил Рамазон Форс кўрфази мамлакатларида, 2020- йилгидек коронавирус пандемияси фонида қаттиқ чекловлар остида ўтказилади. Кувайт ва Уммонда тундан тонггача комендантлик соати ўрнатилган, Қатарда эса Рамазон олдидан дўконлар ва дорихоналардан ташқари деярли барча муассасалар ёпилган эди, мамлакатда парклар, қирғоқлар ва пляжларга бориш тақиқланади, якка спорт турлари бундан мустасно.
Рамазонда диндорлар анъанавий таровиҳ намозини масжидларда эмас, балки уйда ўқиши керак бўлади. Форс кўрфазидаги барча мамлакатларда анъанавий Рамазон чодирлари бекор қилинган, бундай чодирларда рўзадан кейин катта йиғин уюштирилиб, ифторлик қилиш одат тусига кирган эди. Шунингдек, ёпиқ жойларда ва кўчаларда овқат тарқатиш, ифторлик ва саҳарлик учун меҳмонга бориш тақиқланган.
Ўзбекистонда Рамазон ойининг бошланиши 13 апрель этиб белгиланди. Рамазон ойида Ўзбекистондаги 1400 га яқин масжидда Қуръони карим хатм қилиниши маълум қилинган. Шунингдек, Ўзбекистон мусулмонлари идораси рўзадорга макруҳ бўлган амалларни эслатиб ўтди.
Изоҳ (0)