Буюк Британия Мьянма ҳукуматидан мамлакатнинг Лондондаги элчиси Чжо Зо Миннинг фаолиятини тугатиш тўғрисида расмий хабар олди. Бу ҳақда Буюк Британия Ташқи ишлар вазирлигига асосланиб, «Интерфакс» хабар берди.
«Ўтган оқшом Мьянма ҳукумати билан боғланганимизда тегишли дипломатик каналлар орқали элчининг чақириб олиниши тўғрисида расмий хабар олишимиз маълум бўлди. Хабарни олдик, шунинг учун биз Мьянма ҳукуматининг Чжо Зо Минга нисбатан қарорини ҳисобга олишимиз керак», — деди Буюк Британия Ташқи ишлар вазирлиги вакили.
Ўтган ой Чжо Зо Мин ҳибсга олинган Мьянма президенти Вин Мйин ва давлат маслаҳатчиси Аун Сан Су Чжининг озод қилинишини талаб қилувчи баёнот билан чиққан эди. Бунга жавобан Мьянма ҳарбийлари уни лавозимидан четлаштирди.
8 апрель куни Чжо Зо Мин мамлакатнинг Лондондаги элчихонаси ҳудудига киритилмаганини айтди. Майфердаги элчихона олдига элликка яқин киши йиғилиб, дипломатни қўллаб-қувватлади.
Эслатиб ўтамиз, 1 февраль куни Мьянма ҳарбийлари давлат тўнтаришини амалга оширган, ҳукуматнинг амалдаги раҳбарлари ҳибсга олинган эди. Ҳарбийлар Мьянма давлат маслаҳатчиси Аун Сан Су Чжини 11 килограмм олтин ва 600 минг доллар пулни пора сифатида олганликда айбламоқда. Давлат тўнтаришидан кейин мамлакатнинг йирик шаҳарларида норозилик намойишлари бошланган.
Мьянма аҳолиси 6 февраль куни Янгон кўчаларига чиқиб, ҳарбийлар томонидан ҳокимият эгаллаб олинишига қарши чиққан. Одамлар ҳарбийларга қарши эканини билдирмоқда, шунингдек, улар ҳибсга олинган юқори мартабали амалдорларни, жумладан, давлат маслаҳатчиси Аун Сан Су Чжи ва президент Вин Мйинни озод этишни талаб қилмоқда.
Март ойининг бошида ҳам Мьянмадаги полиция ҳамда кўчаларда намойиш ўтказаётган фуқаролар ўртасидаги тўқнашувларда ҳуқуқ-тартибот идоралари ходимларининг ўқотар қуролдан фойдаланиши оқибатида 38 кишининг ҳалок бўлгани маълум қилинган.
Март ойининг охирида Мьянмада ҳукуматни бошқараётган ҳарбийлар мамлакатда сайловлар қайтадан ўтказилганидан кейин бошқарувни янги сайланган вакилларга топширишни ваъда қилди.
Аввалроқ Мьянмада ҳарбийлар 2 ой ичида 40 дан ортиқ болани ўлдиргани, энг кичик қурбон 6 ёшда бўлгани ҳақида хабар берилганди.
Изоҳ (0)