АҚШ президенти Жо Байден ва Украина президенти Владимир Зеленский Байденнинг президентлик фаолияти бошланганидан бери биринчи марта музокаралар ўтказди. Музокаралар тахминан 50 дақиқа давом этди. Бу ҳақда Украина президенти девони раҳбари Андрей Ермакка таяниб, «РБК» хабар берди.
Ермакнинг сўзларига кўра, Байден мамлакатда олиб борилаётган ислоҳотларни қўллаб-қувватлашини таъкидлади, шунингдек, «Украина ва унинг атрофида содир бўлаётган воқеалар тўғрисида тўлиқ маълумотга эга эканини» айтди.
«Байден АҚШ Украинани кўмаксиз ташлаб қўймаслигига ишонтирди. Суҳбат яхши ўтди», — деди Ермак. Музокаралар давомида Зеленский АҚШ президентини Қрим платформаси саммитида иштирок этишга ҳам таклиф қилди.
Оқ уй ҳам мазкур музокаралар ҳақида хабар берди. «Байден АҚШ Россиянинг Донбас ва Қримдаги тажовузига қарши Украинанинг суверенитети ва ҳудудий яхлитлигини қўллаб-қувватлашда давом этаётганини яна бир бор тасдиқлади», — дейилади хабарда.
Аввалроқ АҚШ давлат котиби Энтони Блинкен Қўшма Штатлар бир нечта йўналишларда Украинани қўллаб-қувватлашни кучайтириши ҳақида маълум қилганди.
Маълумот учун, АҚШ Украинага 125 миллион долларлик янги ҳарбий ёрдам пакети ажратишни режалаштирган эди. Янги пакет Украинага «ҳудудий яхлитликни сақлашга, шунингдек, ўз чегараларини ҳимоя қилишни таъминлашга» ёрдам бериш мақсадида ишлаб чиқилган. Ажратилган маблағ «НАТО билан ўзаро ҳамкорликни» яхшилашга ҳам сарфланади.
Ниҳоят, Блинкен яна бир бор АҚШнинг Қрим аннексиясини тан олмаслигини ва «Донбасдаги Россия агрессияси»га қарши эканини таъкидлади.
Аввалроқ АҚШ Россияга Қрим сабаб киритилган санкциялар муддатини бир йилга узайтириб, Навальний туфайли санкцияларнинг иккинчи раунди ҳақида огоҳлантирган эди.
Изоҳ (0)