Фарғона вилояти Тошлоқ туманида хонадонларнинг бирига бостириб кириб, эр-хотинга ҳужум қилган шахслар топилиб, қўлга олинди, дея хабар бермоқда Тергов департаменти.
Маълум қилинишича, 2021 йилнинг 27 март куни соат 02:30 ларда икки нафар номаълум шахс Тошлоқ тумани «Катта кўча» маҳалласида яшовчи 38 ёшли К.У.нинг хонадонига юзларига ниқоб таққан ҳолда ғайриқонуний равишда кирган. Босқинчилар хонадон эгаси ва унинг турмуш ўртоғи 34 ёшли Ш.У.га ҳужум қилган вақтларида К.У. уларнинг бирини ушлаб олган. Шу вақтда иккинчи номаълум шахс ошхона пичоғини олиб, унинг бош, чап курак ва чап биқин соҳаларига жароҳат етказиб, ҳодиса жойидан яширинган.
Мазкур ҳолат юзасидан Тошлоқ тумани ИИБ ҳузуридаги тергов бўлими томонидан Жиноят кодексининг 164-моддаси 3-қисми «в» банди (уй-жойга ғайриқонуний равишда кирган ҳолда босқинчилик қилиш) билан жиноят иши қўзғатилган.
Ҳодиса жойи кўздан кечирилганда номаълум шахсларнинг бирига тегишли эркаклар курткаси ва финка пичоғи ашёвий далил тариқасида расмийлаштириб олинган.
Олиб борилган тезкор қидирув ҳаракатлари давомида ҳодиса жойидан олинган эркаклар курткаси 27 ёшли А.Қ.га тегишли эканлиги аниқланиб, унинг вақтинча яшаш жойи тинтув қилинганда ниқоб сифатида фойдаланилган аёллар колготкаси, қайчи, скотч ўрами ва колготка пакетлари ашёвий далил тариқасида расмийлаштириб олиниб, А.Қ.нинг ўзи ва жиноий шериги 23 ёшли Ж.Ў. ушланган.
Ҳозирда тергов ҳаракатлари олиб борилмоқда.
Бундан аввал Зангиотада ухлаб ётган эр-хотинга ўроқ билан жароҳат етказиб, хонадондан машина ва бошқа буюмларни ўғирлаб кетган шахс ушлангани, Наманганда Хитой фуқароларига нисбатан босқинчилик содир этиб, уларнинг қарийб 20 минг доллар пулини қўлга киритган шахслар қўлга олингани ҳамда Зангиотада 19 ёшли қизни кимсасиз жойга олиб бориб, уни тирноқ олувчи «кусачка» билан қўрқитиб, телефон ва тақинчоқларини ўмарган ҳайдовчи ушлангани ҳақида хабар берилганди.
Изоҳ (0)