Ўзбекистоннинг турли ҳудудларидан Тошкент шаҳрига келиб ўқиётган оилали талабалар учун алоҳида ётоқхона қуриш лозим. Бу ҳақда Сенатнинг Ёшлар, маданият ва спорт масалалари қўмитаси раиси Бахтиёр Сайфуллаев «Дарё» мухбири Мусулмонбек Иброҳимов билан суҳбатда айтиб ўтди.
Сенаторнинг таъкидлашича, сўнгги йилларда олий таълим муассасаларининг сони ошган бўлса-да, талабалар турар жойлари шунга монанд кўпайгани йўқ.
«Ҳозир ректорларнинг чўнтагида пули бор — контрактлар ва супек-контрактлар учун қилинаётиган тўлов пулларидан фойдаланиш керак. Бошқа томондан, талабалар тўлаётган пул ётоқхона харажатларини тўлиқ қоплашга етмайди. Шу боис ҳукумат ёрдам тариқасида пул ажратиб келмоқда», — деди сенатор.
Сайфуллаевнинг алоҳида қайд этишича, оилали талабалар учун алоҳида ётоқхоналар ташкил этиш керак.
«Ўқиш даврида ёки ундан аввал турмуш қурган талаблар бор. Табиийки, оилали талабаларга ётоқхонада яшаш жуда ноқулай. Ёш болалари бўлса, бошқа талабаларнинг ўқишига ҳам халал бериши мумкин. Ҳукумат буни ҳам эътибордан четда қолдирмайди, деб ўйлайман. Вилоятлардан Тошкент шаҳрига келиб ўқиётган оилали талабалар учун ҳар бир олий таълим муассасига алоҳида бўлмаса ҳам, битта умумий ётоқхона ташкил этиш зарур», — деди сенатор.
Маълумот учун, Ўзбекистонда талабаларни турар жой билан таъминлаш масаласи 2021 йил февраль ойида Тошкент шаҳрида ижарада яшаган беш нафар талаба ис газидан заҳарланиб вафот этганидан сўнг кун тартибидаги мавзуга айланди.
Изоҳ (0)