Тошкентда кучли таъсир қилувчи дори воситаларининг ноқонуний савдоси билан шуғулланаётган шахслар ушланди, дея хабар қилмоқда Ички ишлар вазирлиги матбуот хизмати.
Маълум қилинишича, 2021 йилнинг 25 март куни ИИВ ЖҚББ Гиёҳвандлик воситалари билан қонунга хилоф равишда муомала қилишга қарши курашиш бошқармаси ходимлари томонидан Тошкент вилоятининг Оҳангарон туманида тезкор-қидирув тадбири ўтказилган.
Тадбир натижасида Фарғона вилояти Фарғона тумани «Аввал» ҚФЙда яшовчи, 1993 йилда туғилган фуқаро О.С. бошқарувида бўлган Lacetti русумли автомашинада келиб, 4844 дона «Регапен» ва 84 дона «Тропикамид» кучли таъсир қилувчи дори воситаларини 6750 АҚШ доллари эвазига сотаётган вақтида ушланди.
Олинган ашёвий далиллар манбасини аниқлаш мақсадида О.С. билан олиб борилган тезкор комбинациялар натижасида 26 март куни Фарғона вилояти Қувасой шаҳри «Боғбон» маҳалласида яшовчи, 1993 йилда туғилган фуқаро Й.Ш., ушбу маҳаллада яшовчи, 1994 йилда туғилган фуқаро А.Д. бошқарувида бўлган Spark русумли автомашинада Тошкент шаҳри Янгиҳаёт тумани Спутник-5 даҳасига йўловчи сифатида келиб, 1400 дона «Регапен» ва 600 дона «Тропикамид» кучли таъсир қилувчи дори воситаларини 2400 АҚШ доллари эвазига сотаётган вақтида ушланди.
Олинган ашёвий далиллар бўйича экспертиза тайинланган бўлиб, О.С., Й.Ш. ва А.Д. Жиноят-процессуал кодекснинг 224-моддасига асосан ушланган.
Ушланган шахслардан жами 95 765 000 сўм миқдоридаги кучли таъсир қилувчи дори воситаларининг ноқонуний муомалага киритилишининг олди олинди.
Мазкур ҳолат юзасидан Тошкент шаҳар Янгиҳаёт тумани бўйича ИИО ФМБ ҳузуридаги тергов бўлими томонидан Жиноят кодекснинг 251-1-моддаси 3-қисми (уюшган гуруҳ томонидан ёки кўп миқдорда кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят иши қўзғатилиб, тергов ҳаракатлари олиб борилмоқда.
Бундан аввал Фарғонада уйида гиёҳванд модда сақлаб келган шахсга нисбатан жиноят иши қўзғатилгани, Андижонда гиёҳванд моддаларни оёқ кийимга яшириб ўтмоқчи бўлганлар қўлга тушгани ҳамда Мирзо Улуғбек туманида 9,2 миллиард сўмлик қалбаки дориларни қадоқлаб сотишга уринган шахслар қўлга олингани ҳақида хабар берилганди.
Изоҳ (0)