Навоий вилоятининг бир нечта ҳудудида 28 март, якшанба куни кучли ёғингарчилик бўлган. 15 дақиқа ёққан кучли ёмғир оқибатида аҳоли томорқалари ва деҳқон бозори катта зарар кўрган.
«Дарё» мухбирининг аниқлик киритишича, кучли ёмғир вилоятнинг Хатирчи тумани ҳудудидаги Учқорасой, Тасмачисой, Олтинсой, Майдонсой, Миршодсой, Олмонтасой, Боғчикалонсой, Пўлатчи-1, Пўлатчи-2, Аччиқсағаноқсой, Жавшансой сойлари сувининг тўлиб, тез оқиши ва тошиши оқибатида кучайган. Сойлардан тўлиб-тошган сув томорқа ерлари, экин майдонлари ҳамда қисман аҳолининг яшаш жойларига зарар етказган.
Навоий вилоят ҳокимлиги ахборот хизмати раҳбари Искандар Аҳмедовнинг «Дарё»га маълум қилишича, 2021 йилнинг 28 март куни соат 09:20 дан 09:35 га қадар Навоий шаҳри, Кармана ва Хатирчи туманлари ҳудудларида кучли ёғингарчилик кузатилган. Жумладан, Кармана туманида 21 нафар, Хатирчи туманида 15 нафар аҳоли томорқалари, шунингдек, Навоий шаҳридаги деҳқон бозори ҳудудида ёмғир сувлари тўпланган. Бироқ кучли сел фуқаролар ва биноларга зарар етказмаган.
Билдирилишича, аҳоли ҳовлилари ва кўчаларда тўпланган ёмғир сувларини бартараф этиш, уларни ариқ ва зовурларга йўналтириш ҳамда аҳолига тушунтириш ишларини олиб бориш мақсадида вилоят Фавқулодда вазиятлар бошқармаси ва унинг ҳудудий бўлинмаларидан 14 та техника, 72 та шахсий таркиб, шундан 10 та ёнғин ўчириш автомобили, 4 та махсус техника ва 11 та мотопомпа жалб этилган. Бундан ташқари, шаҳар, туман ҳокимликлари, давлат тизими хизматчилик қисмлари томонидан вазият назоратга олинган.
Аҳолининг сўзларига кўра, ёмғир 15—20 дақиқа кучли сел бўлиб ёққан ва кейин секинлашган. Хатирчи туманидаги «Оқ олтин» маҳалласига келган кучли сел кўчаларни тўлдириб оққан. Ҳудуддаги зовурлар тўлиб-тошиб кетган ҳамда аҳоли экин майдонларига талафот етказган. Бир нечта аҳолининг яшаш жойлари ҳам сувга тўлган. Шунингдек, 27—28 март кунлари содир бўлган табиий офат оқибатида Ғозғон ва Нурота туманидаги кўплаб аҳолининг ҳам томорқа ерлари ва экин майдонлари зарар кўрган.
Ҳокимлик ахборот хизмати раҳбари вилоят ҳокими Қобил Турсунов айни кунларда ишчи-гуруҳ билан Хатирчи туманида эканини, ҳар бир ҳолат ўрганилаётганини ва зарар кўрган аҳолига бирламчи ёрдам кўрсатилаётганини билдирди.
Унга кўра, қишлоқларда яшовчи аҳолига тезкор кўмак беришдан ташқари, туман марказидаги кўп қаватли уйларнинг олд ва орқа қисмларида тўпланиб қолган ёмғир сувлари ҳам уйларнинг ертўла қисмига кириб боришининг олдини олишга қаратилган амалий ишлар бошланган.
«Табиий офатдан зарар кўрган томорқа ер, экин майдони, шунингдек, яшаш жойи эгалари эътибордан четда қолмайди. Айни кунда талафот етган манзилларга бирламчи ёрдам кўрсатилмоқда. Ҳолат бўйича барча муаммолар босқичма-босқич ҳал этиб борилади», — дейди Искандар Аҳмедов.
Изоҳ (0)