Тошкент вилояти Бекобод шаҳрида фуқаронинг шахсий суратларини тарқатиб юбормаслик эвазига ундан 5 миллион сўм сўраган вояга етмаган қиз ушланди, дея хабар бермоқда Тергов департаменти.
Қайд этилишича, 2021 йилнинг 25 март куни Бекобод шаҳар ИИБ бошлиғи номига фуқаро 36 ёшли М.Г. ариза билан мурожаат қилиб, турмуш ўртоғининг муқаддам фойдаланган абонент рақамидан номаълум аёл қўнғироқ қилиб, турмуш ўртоғи Ш.В. билан унга тегишли сир сақланиши лозим бўлган ўзаро сурат ва видеоёзувларини интернет орқали тарқатиб юбориш билан қўрқитиб, 5 000 000 сўм пул беришини талаб қилаётганлигини маълум қилган.
Аризага кўра, Бекобод шаҳар 14-даҳаси ҳудудидаги «Зиёда» тўйхонаси яқинида такси ҳайдовчиси орқали бериб юборилган 500 АҚШ долларини номаълум аёл товламачилик йўли билан олаётганида ИИБ ходимлари томонидан ушланиб, ундан 500 доллар ашёвий далил тариқасида олинган.
Терговга қадар текширув ҳаракатлари давомида, ушбу жиноятни 9-синф ўқувчиси 15 ёшли М.Х. содир этгани аниқланиб, у Ш.В.га тегишли бўлган абонент рақамини сотиб олиб, ушбу рақамга Telegram иловасини очиб, эски хотираларни тиклаши натижасида ўзга шахсларнинг фото ва видеосуратларини қўлга киритган.
Мазкур ҳолат юзасидан Бекобод шаҳар ИИБ ҳузуридаги тергов бўлими томонидан вояга етмаган М.Х.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилиб, гумон қилинувчи тариқасида жалб қилинган.
Ҳозирда тергов ҳаракатлари олиб борилмоқда.
Бундан аввал Хоразмда аёлнинг шахсий видеотасвирларини қариндошларига кўрсатиш билан қўрқитиб, ундан 1,5 минг доллар ва телефон талаб қилган йигит ушлангани, Тошкентда қизи ва йигит ўртасидаги муносабатларни сир сақлаш учун йигитнинг отасидан пул талаб қилган аёлга жиноят иши қўзғатилгани ҳамда Фарғонада дугонасининг суратларини турмуш ўртоғига кўрсатмаслик учун 1,5 минг доллар талаб қилган қизлар ушлангани ҳақида хабар берилганди.
Изоҳ (0)