Санитария-эпидемиологик осойишталик ва жамоат саломатлиги хизмати Тошкент вилояти бошқармасининг икки мудири пора олаётганида ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум бўлишича, ушбу бошқарма бўлим мудири Х.Ф. «Х.Д.» хусусий корхонасига қарашли Ўрта Чирчиқ туманида жойлашган ер майдонидан олинган намуналар бўйича эпизотик касалликлар мавжуд эмаслиги тўғрисидаги хулосани ижобий ҳал қилиб бериш эвазига пора тариқасида 800 доллар талаб қилган. Пулларни олган вақтида мудирлар Департамент ҳамда ДХХнинг Шайхонтоҳур туман бўлимлари томонидан ўтказилган тезкор тадбирда ушланган.
Унинг кўрсатувларига асосан тадбир давом эттирилганда, бошқарманинг юқумли касалликларга хулоса беришга масъул бўлими мудири Р.Х. Х.Ф.дан 400 долларни пора тариқасида олган вақтида ашёвий далиллар билан ушланган.
Мазкур ҳолат юзасидан Х.Ф. ва Р.Х.га нисбатан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, Сенат раиси Танзила Норбоева Олий Мажлис Сенатининг олтинчи ялпи мажлисида санитария-эпидемиология хизмати («СЭС») мутасаддилари томонидан 1,75 миллиард сўмдан ортиқ маблағ талон-торож қилинганини маълум қилганди.
Изоҳ (0)